تاثیر 12 اگست ۲۰۲۵:- ایس -ایم- حسن
ارریہ، 12 اگست : بہار میں مسلسل موسلادھار بارش اور نیپال سے چھوڑے جانے والے پانی کی وجہ سے بہار کے کئی اضلاع سیلاب کی زد میں ہیں۔ کئی اضلاع کی بیشتر پنچایتوں میں سیلاب کے پانی نے لوگوں کا جینا مشکل کر دیا ہے۔
لوگ اونچی جگہوں پر پناہ لینے پر مجبور ہو گئے ہیں۔ اس کے ساتھ ہی حکومت کی طرف سے دی جانے والی مدد کہیں پہنچ رہی ہے اورکہیں نہیں پہنچ رہی ہے۔ موسلا دھار بارش اور سیلاب نے پٹنہ، بھاگلپور، بیگوسرائے سمیت سات اضلاع کو جھیل میں تبدیل کر دیا ہے۔ گنگا، کوسی، باگمتی، بوڑھی گنڈک، پن پن، گھگھرا، سون، کملا، ادھوارا اور کنکئی ندیاں خطرے کے نشان سے اوپر بہہ رہی ہیں، جس کی وجہ سے تقریباً 18 لاکھ لوگ متاثر ہوئے ہیں اور کئی لوگوں کی موت ہو چکی ہے۔
ہندوستان کے محکمہ موسمیات نے شمالی بہار کے آٹھ اضلاع سپول، ارریہ، کشن گنج، پورنیہ، کٹیہار، مدھے پورہ، سہرسہ اور مدھوبنی میںموسلا دھار بارش کے لیے اورنج الرٹ جاری کیا ہے اور سیتامڑھی، شیوہر، مشرقی چمپارن، مغربی چمپارن سمیت 11 دیگر اضلاع میں یلو الرٹ جاری کیا ہے۔ پٹنہ سمیت جنوبی بہار کے 19 اضلاع میں ہلکی سے درمیانی بارش کا الرٹ ہے۔ ادھر پٹنہ میں منگل کی صبح 11:30 بجے کے بعد ہلکی بارش شروع ہو گئی ہے۔ محکمہ نے اس حوالے سے پہلے ہی الرٹ جاری کر دیا تھا۔
محکمہ موسمیات نے آج پٹنہ میں ہلکی سے درمیانی بارش کی پیشن گوئی کی تھی۔ محکمہ نے دوپہر میں 25-30 کلومیٹر فی گھنٹہ کی رفتار سے ہوائیں چلنے اور زیادہ سے زیادہ درجہ حرارت 31 ° C اور کم سے کم 26 ° C رہنے کی پیشن گوئی کی ہے۔
گزشتہ 24 گھنٹوں میں سب سے زیادہ بارش شیوہر میں درج کی گئی، جبکہ کٹیہار میں 140 ملی میٹر، نالندہ میں 70 ملی میٹر اور پٹنہ میں 57 ملی میٹر بارش ہوئی۔ مانسون کی گرت دربھنگہ سے گزر رہی ہے اور خلیج بنگال سے چلنے والی نم ہواو ں کی وجہ سے 14 اگست تک موسلادھار بارش جاری رہے گی۔ سپول، ارریہ، کشن گنج اور پورنیہ میں ضرورت سے زیادہ بارش کی وارننگ دی گئی ہے، جب کہ سیتامڑھی، مدھوبنی اور کٹیہار میں 30/4 کلومیٹر سے کم رفتار کے ساتھ ہوائیں چل سکتی ہیں۔راجدھانی پٹنہ میں گنگا ندی کی حالت کے بارے میں بات کریں تو یہ دیگھا گھاٹ پر 51.62 میٹر اور گاندھی گھاٹ پر 50.20 میٹر کے خطرے کے نشان سے اوپر بہہ رہی ہے۔گنگا کا پانی بھاگلپور کے سلطان گنج کے قریب این ایچ 80 تک پہنچ گیا، جس کی وجہ سے سڑکوں پر ٹریفک بند ہے۔ نوگچھیا میں 15 کروڑ روپے کی لاگت سے بنائے گئے رنگ ڈیم کا 70 فیصد حصہ بہہ گیا، جس سے گوپال پور بلاک میں سیلاب کی صورتحال مزید سنگین ہو گئی۔
بیگوسرائے میں سیلاب کی وجہ سے 137 اسکول اور آنگن باڑی مراکز 14 اگست تک بند ہیں۔ بھاگلپور، بکسر، مونگیر، ویشالی، کھگڑیا اور بیگوسرائے میں سیلاب کا پانی گھروں اور کھیتوں میں داخل ہوگیا ہے، جس سے فصلوں کو بھاری نقصان پہنچا ہے۔
ڈیزاسٹر منیجمنٹ ڈپارٹمنٹ اور این ڈی آر ایف کی 14 ٹیمیں امدادی کاموں میں مصروف ہیں، جن کی ٹیمیں دربھنگہ، سپول، موتیہاری اور نالندہ میں تعینات ہیں۔
پٹنہ میں 35 کشتیاں سرگرم ہیں اور بھاگلپور میں ریلیف کیمپ، کمیونٹی کچن اور میڈیکل کیمپ لگائے گئے ہیں۔ بکسر میں گنگا کے پانی کی سطح میں قدرے کمی آئی ہے لیکن پن پن ندی کی سطح بڑھ رہی ہے، جس کے لیے انتظامیہ چوکس ہے۔