کوٹ بازار میں چاقو سے حملہ، نوجوان شدید زخمی، حالت نازک

سیتامڑھی۔ (مظفر عالم)

نگر تھانہ علاقے کے کوٹ بازار میں بدھ کی دیر رات آپسی تنازعہ نے پرتشدد رخ اختیار کر لیا، جب بدمعاشوں نے ایک نوجوان پر چاقو سے پے در پے حملہ کر کے اسے شدید زخمی کر دیا۔ زخمی نوجوان کی شناخت کوٹ بازار کے رہائشی وجے ٹھاکر کے 18 سالہ بیٹے انکیت کمار کے طور پر ہوئی ہے۔ بتایا جاتا ہے کہ واقعہ کے وقت دو بدمعاشوں نے انکیت کو گھیر لیا اور اس پر لگاتار چاقو سے وار کیے۔ حملے میں نوجوان کو تین جگہ چاقو لگنے کی اطلاع ہے، جس کے باعث اس کی حالت نازک بنی ہوئی ہے۔ واقعہ کے بعد حملہ آور اس کا موبائل چھین کر موقع سے فرار ہو گئے۔ اہل خانہ کے مطابق، انکیت کمار مقامی ایک کپڑے کی دکان میں کام کرتا ہے۔ اس کی ماں نے بتایا کہ وہ دربھنگہ سے علاج کرا کر شام میں گھر لوٹا تھا۔ اسی دوران اس کے کچھ دوست اسے گھر سے بلا کر لے گئے، جہاں کسی بات کو لے کر تکرار ہو گئی۔ تنازعہ بڑھنے پر بدمعاشوں نے اس پر چاقو سے حملہ کر دیا۔ زخمی نوجوان کو فوری طور پر صدر اسپتال میں داخل کرایا گیا ہے، جہاں اس کا علاج جاری ہے۔

واقعہ کی اطلاع پولیس کو دے دی گئی ہے اور پولیس معاملے کی تفتیش میں مصروف ہے۔ ملزمان کی تلاش جاری ہے۔