تاثیر 10 جولائی ۲۰۲۶:- ایس -ایم- حسن
موتیہاری،10جولائی(خالد سیف اللہ): مشرقی چمپارن کے مفصل تھانہ علاقے میں جمعہ کی صبح سرکاری بورڈ لگی ایک کار اور موٹر سائیکل کے درمیان ہونے والے سڑک حادثے میں ایک 18 سالہ نوجوان شدید زخمی ہو گیا۔ زخمی کی شناخت پیپرا تھانہ کے سرسیا مہارانی گاؤں کے رہائشی روی کمار کے طور پر ہوئی ہے، جسے تشویشناک حالت میں علاج کے لیے رحمانیہ میڈیکل سینٹر میں داخل کرایا گیا ہے۔ پولیس نے حادثے میں ملوث کار کو ضبط کرتے ہوئے اس کے ڈرائیور کو حراست میں لے لیا ہے۔
پولیس اور عینی شاہدین کے مطابق حادثہ اس وقت پیش آیا جب مفصل تھانہ علاقے میں تیز رفتار کار نے موٹر سائیکل کو زور دار ٹکر مار دی۔ ٹکر اس قدر شدید تھی کہ کار کے دونوں ایئر بیگز کھل گئے، جبکہ موٹر سائیکل سوار نوجوان سڑک پر جا گرا اور اس کے سر سمیت جسم کے مختلف حصوں پر شدید چوٹیں آئیں۔ ڈاکٹروں کے مطابق زخمی کی حالت نازک بنی ہوئی ہے۔
حادثے کے بعد مقامی لوگوں نے فوری طور پر زخمی کو اسپتال پہنچایا اور پولیس کو اطلاع دی۔ اطلاع ملتے ہی مفصل تھانہ صدر امیت کمار کی ہدایت پر پولیس ٹیم موقع پر پہنچی، حادثہ زدہ کار اور موٹر سائیکل کو قبضے میں لے کر ٹریفک بحال کرایا۔
پولیس کے مطابق حادثے میں استعمال ہونے والی کار پر حکومتِ بہار کے محکمہ وسائلِ آب (جل وسائل محکمہ) کا بورڈ لگا ہوا تھا۔ تاہم پولیس یہ جانچ کر رہی ہے کہ حادثے کے وقت گاڑی سرکاری ڈیوٹی پر تھی یا نجی استعمال میں۔ ڈرائیور سے پوچھ گچھ جاری ہے اور واقعے کے تمام پہلوؤں کی تحقیقات کی جا رہی ہیں۔
حادثے کی اطلاع ملتے ہی زخمی نوجوان کے اہل خانہ اسپتال پہنچ گئے۔ بتایا جاتا ہے کہ روی کمار اپنے والدین کا اکلوتا بیٹا ہے، جس کے باعث گھر والوں کا رو رو کر برا حال ہے۔ پولیس نے بتایا کہ قانونی کارروائی شروع کر دی گئی ہے اور تحقیقات کی روشنی میں آئندہ اقدامات کیے جائیں گے۔