تاثیر 22 جولائی ۲۰۲۶:- ایس -ایم- حسن
اوریا، 22 جولائی: اتر پردیش کے اوریا ضلع کے صدر ترقیاتی بلاک کے بیجل پور گاؤں کے ایک پرائمری اسکول میں کھلے آسمان تلے زمین پر بٹھاکربچوں کو پڑھائے جانے کا ویڈیو بدھ کی صبح سوشل میڈیا پر وائرل ہوگیا۔ اس ویڈیو کے سامنے آنے کے بعد مقامی رہائشیوں اور والدین نے تعلیمی نظام اور اسکول انتظامیہ پر سوالات اٹھائے ہیں۔
وائرل ویڈیو میں اسکول کے بچے کھلے میدان میں زمین پربیٹھ کر پڑھتے نظر آ رہے ہیں۔ نہ کوئی فرنیچر ہے اور نہ ہی بچوں کے بیٹھنے کے لیے کوئی چٹائی یا بینچ ہیں۔ اس سے یہ خدشات پیدا ہورہے ہیں کہ شدید گرمی اور بارش کے موسم میں ان کی پڑھائی متاثر ہوگی۔
مقامی لوگوں کا کہنا ہے کہ حکومت پریشدیہ اسکولوں میں بچوں کو بہتر تعلیمی ماحول فراہم کرنے کے لیے فرنیچر سمیت بنیادی سہولیات فراہم کر رہی ہے۔ اس کے باوجود بچوں کو کھلے آسمان تلے زمین پر پڑھانا نظام پر سنگین سوالات اٹھاتا ہے۔
گاؤں والوں نے الزام لگایا کہ اسکول کے دستیاب وسائل کا صحیح استعمال نہیں کیا جا رہا ہے۔ ان کا کہنا تھا کہ اگر کسی وجہ سے کلاس روم میں تدریس ممکن نہیں تھی تب بھی بچوں کے لیے بیٹھنے کا مناسب انتظام کیا جانا چاہیے تھا تاکہ انہیں تکلیف کا سامنا نہ کرنا پڑے۔