اسکولوں میں بچوں کی ذہنی صحت اور تحفظ پر سہ روزہ ورکشاپ کا آغاز

کولکاتا، 27/ جولائی (تاثیر بیورو) سینٹ آگسٹین ڈے اسکول اور عظیم پریم جی فاؤنڈیشن، حیدرآباد کے مشترکہ تعاون سے “اسکولوں میں بچوں کی ذہنی صحت اور تحفظ کو مضبوط بنانے کے لیے مداخلت” کے عنوان سے سہ روزہ سیمینار و ورکشاپ کا آغاز سی آر گیسپر میموریل ہال میں ہوا، جو 29 جولائی تک جاری رہے گی۔

ورکشاپ کا مقصد اساتذہ، اسکول کونسلرز اور ماہرینِ تعلیم کو بچوں کی ذہنی صحت، نفسیاتی معاونت اور تحفظ سے متعلق جدید معلومات اور عملی تربیت فراہم کرنا ہے تاکہ تعلیمی اداروں میں محفوظ، دوستانہ اور معاون تعلیمی ماحول کو فروغ دیا جا سکے۔

پریس کانفرنس سے خطاب کرتے ہوئے معروف ماہرِ اطفال و نفسیات ڈاکٹر شیکھر سیشادری نے کہا کہ ورکشاپ میں بچوں کی ذہنی صحت، نفسیاتی مسائل کی بروقت شناخت، مؤثر معاونت اور چائلڈ پروٹیکشن کے عملی طریقوں پر تفصیلی تبادلۂ خیال کیا جائے گا۔ ڈاکٹر شیلا راماسوامی نے کہا کہ بچوں کے حقوق، تحفظ اور ذہنی فلاح کو یقینی بنانے کے لیے اسکولوں میں جامع اقدامات وقت کی اہم ضرورت ہیں۔ اسکول کے پرنسپل ڈاکٹر رچرڈ گیسپر نے کہا کہ اس پروگرام سے اساتذہ اور اسکول کونسلرز کی صلاحیتوں میں اضافہ ہوگا، جس سے طلبہ کی ذہنی نشوونما اور فلاح و بہبود کو بہتر انداز میں فروغ ملے گا۔

اس موقع پر اسکول کی صدر مسز ایڈنا گیسپر اور مسز ایسٹر گیسپر سمیت متعدد معزز شخصیات بھی موجود تھیں۔