لوٹ کی کوشش ناکام نامعلوم جرائم پیشہ نے پان تاجر کو پاؤں میں ماری گولی

سنگھواڑہ دربھنگہ( محمد مصطفیٰ) سمری تھانہ علاقے میں این ایچ 27 پر منگل کی رات لوٹ کی کوشش کے دوران ایک موٹر سائیکل سوار مجرم نے پان کاروباری کو پاؤں میں گولی مار کر زخمی کر دیا۔ زخمی کا علاج دربھنگہ میڈیکل کالج اسپتال (ڈی ایم سی ایچ) میں جاری ہے۔ پولیس نے جائے وقوعہ سے ایک خالی کارتوس برآمد کر کے معاملے کی تحقیقات شروع کر دی ہے زخمی کی شناخت مادھوپور بستواڑہ پنچایت کے مادھوپور وارڈ نمبر 15 کے رہائشی، آنجہانی موتی بھگت کے 50 سالہ بیٹے بالا بھگت کے طور پر ہوئی ہے۔ ان کے بھائی اور پڑوسی اودھیش چورسیا نے بتایا کہ بالا بھگت گزشتہ 25 برسوں سے پان کا کاروبار کر رہے ہیں اور روزانہ دربھنگہ پان پہنچانے جاتے ہیں انہوں نے بتایا کہ منگل کی رات تقریباً 10:30 بجے وہ دربھنگہ سے اپنے گاؤں واپس آ رہے تھے۔ اسی دوران کنسی اور شوبھن کے درمیان این ایچ-27 پر واقع ایک اینٹ بھٹے کے قریب پلسر موٹر سائیکل پر سوار ایک مجرم نے ان کا پیچھا کیا اور انہیں روکنے کی کوشش کی۔ جب وہ نہیں رکے تو مجرم نے ان پر فائرنگ کر دی۔ گولی ان کی بائیں پاؤں کو چھوتی ہوئی نکل گئی، جس سے وہ زخمی ہو گئے گولی لگنے کے باوجود بالا بھگت کسی طرح آگے بڑھے اور مقامی لوگوں کی مدد سے پولیس اور اپنے اہل خانہ کو واقعے کی اطلاع دی اطلاع ملتے ہی سمری تھانہ انچارج اروند کمار پولیس فورس کے ساتھ موقع پر پہنچے اور زخمی کو علاج کے لیے ڈی ایم سی ایچ، دربھنگہ بھیج دیا۔ تھانہ انچارج نے بتایا کہ زخمی کی حالت خطرے سے باہر ہے۔ پولیس تکنیکی ٹیم کی مدد سے آس پاس کے سی سی ٹی وی فوٹیج کا جائزہ لے رہی ہے اور فرار ملزم کی شناخت کر کے اس کی گرفتاری کے لیے ممکنہ ٹھکانوں پر چھاپہ ماری کر کارروائی جاری ہے۔ پولیس کا دعویٰ ہے کہ جلد ہی اس واردات کا پردہ فاش کر کے ملزم کو گرفتار کر لیا جائے گا