تاثیر 29 جولائی ۲۰۲۶:- ایس -ایم- حسن
واشنگٹن،29جولائی: یوکرین کے صدر ولادیمیر زیلنسکی نے کہا ہے کہ امریکی صدر ڈونلڈ ٹرمپ نے یوکرین کو پیٹریاٹ انٹرسیپٹر میزائلوں کی مقامی تیاری کے لیے لائسنس دینے پر آمادگی ظاہر کی ہے، جس سے یوکرین کی فضائی دفاعی صلاحیت میں نمایاں اضافہ ہونے کی توقع ہے۔
زیلنسکی نے امریکی ٹی وی چینل فاکس نیوز کو دیے گئے انٹرویو میں بتایا کہ صدر ٹرمپ کے ساتھ ان کی ملاقات انتہائی مثبت رہی، جس میں پیٹریاٹ میزائلوں کی تیاری کے لائسنس سمیت دفاعی تعاون کے مختلف پہلوؤں پر اتفاقِ رائے ہوا۔ ان کے بقول، اس پیش رفت سے یوکرین کو اپنی دفاعی ضروریات پوری کرنے میں مدد ملے گی۔
پیٹریاٹ فضائی دفاعی نظام کو روسی بیلسٹک میزائل حملوں کے خلاف یوکرین کا سب سے مؤثر دفاعی ہتھیار سمجھا جاتا ہے۔ یوکرینی قیادت پہلے ہی متعدد بار اس بات کی نشاندہی کر چکی ہے کہ ملک کو انٹرسیپٹر میزائلوں کی شدید کمی کا سامنا ہے، جبکہ عالمی سطح پر بڑھتی ہوئی طلب کے باعث ان کی فراہمی بھی متاثر ہوئی ہے۔