برہم استھان کی زمین پر درخت کاٹنے کا الزام، دیہی باشندوں کا ضلع مجسٹریٹ سے کارروائی کا مطالبہ

سنگھواڑہ دربھنگہ( محمد مصطفیٰ) دربھنگہ ضلع کے سنگھواڑہ بلاک اور نگر پنچایت علاقے کے دیہی باشندوں نے برہم استھان احاطے میں ماحولیاتی تحفظ اور مذہبی مقاصد کے تحت لگائے گئے پودوں کو کاٹنے کا الزام عائد کرتے ہوئے ضلع مجسٹریٹ سے قصورواروں کے خلاف قانون کے مطابق کارروائی کا مطالبہ کیا ہے۔دیہی باشندوں کی جانب سے ضلع مجسٹریٹ کو دی گئی درخواست میں کہا گیا ہے کہ مقامی لوگوں نے اپنی ذاتی اور سماجی تعاون سے ماحولیات کے تحفظ، سرسبز ترقی اور مذہبی عقیدت کے پیش نظر برہم استھان احاطے میں پودے لگائے تھے۔ الزام ہے کہ بعض زمین مافیا برہم استھان کی زمین پر غیر قانونی قبضہ کرنے کی نیت سے ان سرسبز پودوں کو کٹوا رہے ہیں اور وہاں غیر قانونی عمارت کی تعمیر کی تیاری کر رہے ہیں۔

درخواست میں یہ بھی ذکر کیا گیا ہے کہ اس سے قبل تعمیر شدہ شادی بھون اور ٹرسٹ بھون کو عوامی مفاد کے بجائے ذاتی استعمال میں لائے جانے کی شکایات بھی سامنے آتی رہی ہیں۔ دیہی باشندوں نے پورے معاملے کی غیر جانبدارانہ تحقیقات کرانے کا مطالبہ کیا ہے۔انہوں نے ضلع مجسٹریٹ سے اپیل کی ہے کہ برہم استھان کی زمین اور وہاں لگائے گئے پودوں کی حفاظت کو یقینی بنایا جائے، نیز ماحولیات کو نقصان پہنچانے اور غیر قانونی قبضے کی کوشش کرنے والے افراد کے خلاف قانون کے مطابق سخت کارروائی کی جائے۔ دیہی باشندوں کا کہنا ہے کہ یہ معاملہ صرف ماحولیات کے تحفظ تک محدود نہیں بلکہ مذہبی عقیدت اور عوامی املاک کے تحفظ سے بھی جڑا ہوا ہے۔ انہوں نے انتظامیہ سے فوری مداخلت کرتے ہوئے سرسبز علاقے اور برہم استھان کی زمین کو محفوظ بنانے کی اپیل کی ہے