تاثیر 21 اگست ۲۰۲۶:- ایس -ایم- حسن
متھرا، 21 اگست: اتر پردیش کے متھرا ضلع کے ورنداون میں جمعہ کی صبح ایک زیر تعمیر مال کی شٹرنگ اچانک گرنے سے بڑا حادثہ پیش آیا۔ ملبے میں دب کر تین مزدوروں کی موت ہوگئی، جبکہ ایک مزدور شدید زخمی ہوگیا۔ زخمی مزدور کی حالت نازک بتائی جارہی ہے۔ حادثہ کوتوالی ورنداون علاقے میں ورنداون رکمنی وہار گول چکر کے قریب واقع اومیکس کے زیر تعمیر مال میں پیش آیا۔ بتایا گیا ہے کہ چوتھی منزل پر لینٹر ڈالنے کا کام جاری تھا کہ اچانک شٹرنگ بھر بھرا کر نیچے آگری۔ اس وقت وہاں کام کرنے والے کئی مزدور ملبے کی زد میں آگئے، جس کے بعد موقع پر افراتفری مچ گئی۔
حادثے میں مجموعی طور پر چار مزدور ملبے میں دب گئے۔ نیپال کے رہنے والے شیورام کی موقع پر ہی موت ہوگئی، جبکہ مغربی بنگال کے رہائشی عالم اور رفیق نے اسپتال لے جاتے ہوئے دم توڑ دیا۔
چوتھے مزدور دلدار، جو مغربی بنگال کا رہنے والا ہے، کو بھی ملبے سے نکال لیا گیا۔ اس کی حالت تشویشناک بتائی جارہی ہے۔ ابتدائی طبی امداد کے بعد اسے بہتر علاج کے لیے آگرہ کے ایس این میڈیکل کالج ریفر کردیا گیا ہے۔
حادثے کی اطلاع ملتے ہی ضلع انتظامیہ، پولیس اور فائر بریگیڈ کی ٹیمیں موقع پر پہنچ گئیں اور فوری طور پر راحت و بچاؤ کا کام شروع کیا گیا۔ ضلع مجسٹریٹ چندر پرکاش سنگھ اور سینئر سپرنٹنڈنٹ آف پولیس شلوک کمار نے بھی موقع پر پہنچ کر ریسکیو آپریشن کا جائزہ لیا۔ضلع مجسٹریٹ نے بتایا کہ حادثے کی اطلاع ملتے ہی پولیس اور فائر بریگیڈ کی ٹیموں کو ریسکیو آپریشن میں لگا دیا گیا تھا۔ فائر بریگیڈ کی ٹیم نے گہرائی سے سرچ آپریشن کیا، جس کے بعد یہ تصدیق ہوگئی کہ ملبے میں اب کوئی دوسرا مزدور نہیں پھنسا ہوا ہے۔
انتظامیہ کی جانب سے حادثے میں ہلاک ہونے والے مزدوروں کے اہل خانہ سے رابطہ کیا جارہا ہے۔ حکام نے واقعے کی وجوہات کی تحقیقات کا حکم دیا ہے۔ ضلع مجسٹریٹ نے کہا کہ تحقیقات کی بنیاد پر ضابطے کے مطابق سخت کارروائی کی جائے گی۔