تاثیر 22 ستمبر ۲۰۲۶:- ایس -ایم- حسن
جموں, 22 ستمبر:جموں و کشمیر کے ضلع سانبہ میں پیر کی شب دہلی جانے والی ایک ٹرین کے ڈرائیور کیبن کا شیشہ ٹوٹنے کے بعد ریلوے ٹریک کے اطراف تلاشی مہم چلائی گئی۔ ابتدائی تحقیقات میں تخریب کاری کا امکان خارج کر دیا گیا ہے، تاہم شیشہ ٹوٹنے کی اصل وجہ جاننے کے لیے تحقیقات جاری ہیں۔حکام کے مطابق ٹرین پیر کی رات جموں توی ریلوے اسٹیشن سے دہلی کے لیے روانہ ہوئی تھی۔ وجے پور علاقے سے گزرتے وقت ڈرائیور کیبن کا ایک شیشہ مبینہ طور پر کسی چیز کی زد میں آکر ٹوٹ گیا، جس کے بعد لوکو پائلٹ نے اسٹیشن ماسٹر کو اطلاع دی۔واقعے کی اطلاع ملتے ہی پولیس کے اعلیٰ افسران اور اہلکار موقع پر پہنچ گئے۔ گورنمنٹ ریلوے پولیس کے ساتھ مل کر ریلوے ٹریک کے اطراف مشترکہ تلاشی مہم چلائی گئی تاکہ واقعے کی وجوہات کا پتہ لگایا جا سکے۔حکام نے بتایا کہ واقعے کے وقت قریبی علاقے میں ایک شادی کی تقریب بھی جاری تھی، تاہم شیشہ ٹوٹنے کی اصل وجہ ابھی واضح نہیں ہوسکی ہے۔ضروری مرمت کے بعد ٹرین تقریباً رات ساڑھے 9 بجے دوبارہ دہلی کے لیے روانہ ہوگئی۔