تاثیر6 اکتوبر ۲۰۲۶:- ایس -ایم- حسن
نئی دہلی، 6 اکتوبر: انڈین پریمیئر لیگ (آئی پی ایل) 2027 سیزن سے قبل دہلی کیپیٹلز نے منگل کو بھارتی کرکٹ ٹیم کے سابق کپتان سورو گنگولی کو اپنی ٹیم کا ہیڈ کوچ مقرر کیا ہے۔ گنگولی 2019 میں ایڈوائزر کی حیثیت سے دہلی کیپیٹلز سے وابستہ ہوئے تھے۔میڈیا کو جاری کی گئی معلومات کے مطابق، ان برسوں کے دوران انہوں نے کیپیٹلز کے ساتھ کئی اہم ذمہ داریاں نبھائی ہیں، جن میں مردوں اور خواتین، دونوں ٹیموں کے لیے ’ڈائریکٹر آف کرکٹ‘ کا عہدہ بھی شامل ہے۔اپنی تقرری پر سورو گنگولی نے کہا کہ وہ ہیڈ کوچ کی ذمہ داری سنبھالنے کے لیے پرجوش ہیں اور دہلی کیپیٹلز ان کے دل کے بہت قریب ہے۔ انہوں نے مالکان، انتظامیہ، اسٹاف اور کھلاڑیوں کے ساتھ اپنے طویل عرصے سے جاری تعلق کا ذکر کرتے ہوئے کہا کہ وہ نئے سیزن کے لیے ایک مضبوط اور بے خوف ٹیم تیار کرنے کے لیے باصلاحیت اسکواڈ کے ساتھ کام کرنے کے منتظر ہیں۔
انہوں نے کہا، ’’میں آئی پی ایل میں ہیڈ کوچ کی ذمہ داری سنبھالنے کے لیے پرجوش ہوں۔ دہلی کیپیٹلز ایک ایسی فرنچائز ہے جو میرے دل کے بہت قریب ہے اور جس کے ساتھ میرا کئی برسوں سے مضبوط رشتہ رہا ہے۔ میں نے مالکان، انتظامیہ، سپورٹ اسٹاف اور کھلاڑیوں کے ساتھ مل کر کام کیا ہے، جس کی وجہ سے یہ میرے لیے ایک دلچسپ ذمہ داری بن گئی ہے۔ ہمارے پاس باصلاحیت کھلاڑیوں کا گروپ ہے اور ہم نے حالیہ عرصے میں اچھی کرکٹ کھیلی ہے۔ میں اسکواڈ کے ساتھ کام کرنے، نئے سیزن اور ایک مضبوط اور بے خوف ٹیم تیار کرنے کے لیے پرجوش ہوں۔‘‘