Taasir Urdu News Network – Syed M Hassan 24th March
لکھنؤ، 24 مارچ :ایس پی صدر اکھلیش یادو نے کہا کہ کانگریس کے دور میں ہی قانون لایا گیا تھا، جس کا نتیجہ آج آپ دیکھ رہے ہیں۔ اپوزیشن کے کئی رہنما حکومت کے جال میں پھنس گئے ہیں۔ کانگریس کو سوچنا ہوگا کہ اس حکومت (بی جے پی) کو کیسے ہٹایا جائے۔ سماج وادی پارٹی کے قومی صدر اکھلیش یادو نے جمعہ کو راہل گاندھی کے خلاف ہتک عزت کے مقدمے کے فیصلے کو لے کر یہ بیان دیا ہے۔
اکھلیش نے کہا کہ ان کی پارٹی کے لیڈر عرفان سولنکی، اعظم خان کو جھوٹے مقدمات میں پھنسایا گیا ہے۔ عبداللہ اعظم کو بھی اسی طرح کے مقدمات میں پھنسایا گیا ہے۔ ایس پی صدر نے کہا کہ باہر سے افسران لا کر اپوزیشن لیڈروں کے خلاف جھوٹے مقدمات بنوائے جا رہے ہیں۔ سب کو سوچنا ہوگا کہ بی جے پی حکومت کو کیسے ہٹایا جائے۔ 2024 میں عوام اس حکومت کو ہٹا دیں گے۔ نائب وزیر اعلیٰ کیشو پرساد موریہ کے بیان کو پلٹتے ہوئے اکھلیش یادو نے کہا کہ دلتوں اور پسماندہ لوگوں پر تشدد کیا جاتا ہے اور وہ دیکھ رہے ہیں۔
