تاثیر،۴ دسمبر۲۰۲۳:- ایس -ایم- حسن
لندن ، 4دسمبر:کرکٹ کے موجد انگلینڈ کی ٹیم ان دنوں بہت خراب فارم میں نظر آ رہی ہے۔ حالیہ ون ڈے ورلڈ کپ میں انگلینڈ نے توقع سے زیادہ خراب کارکردگی کا مظاہرہ کیا۔ اب ویسٹ انڈیز کے دورے پر پہنچنے والے انگلینڈ کو شکست سے شروعات کی ہے ۔ ویسٹ انڈیز نے پہلے ون ڈے میں انگلینڈ کو 4 وکٹوں سے شکست دے دی، جبکہ 2023 کے ون ڈے ورلڈ کپ میں انگلینڈ لیگ کے 9 میں سے صرف 3 میچ جیت سکا تھا۔ اب ویسٹ انڈیز نے انہیں شکست دے کر ان کے زخم تازہ کر دیئے ہیں۔ ہدف کا تعاقب کرتے ہوئے کپتان شائی ہوپ نے ویسٹ انڈیز کے لیے 109* رنز کی ناقابل شکست سنچری کھیلی۔سر ویوین رچرڈز اسٹیڈیم میں کھیلے گئے میچ میں انگلینڈ نے ٹاس جیت کر بیٹنگ کا فیصلہ کیا اور مقررہ 50 اوورز میں تمام 10 وکٹوں کے نقصان پر 325 رنز بنائے۔ انگلش ٹیم کی جانب سے ہیری بروک نے 71 رنز کی سب سے بڑی اننگز کھیلی۔ اس کے علاوہ اوپننگ میں آنے والے فلپ سالٹ نے 28 گیندوں پر 5 چوکوں اور 3 چھکوں کی مدد سے 45 رنز بنائے۔ انگلینڈ کے ٹوٹل کو دیکھ کر ایسا لگ رہا تھا کہ وہ یہ میچ باآسانی جیت جائے گا لیکن ویسٹ انڈیز کے کپتان نے ناقابل شکست سنچری بنا کر انگلش ٹیم کے زخم تازہ کردیئے ۔ ویسٹ انڈیز نے 48.5 اوورز میں 6 وکٹوں پر 326 رنز کا بڑا ٹوٹل حاصل کیا۔326 رنز کے ہدف کے تعاقب میں ویسٹ انڈیز کو برینڈن کنگ اور ایلک اتھاناز نے شاندار آغاز فراہم کیا، جنہوں نے پہلی وکٹ کے لیے 104 (106 گیندوں) کی شراکت داری کی، جو 18ویں اوور میں اس وقت ختم ہوئی جب لیونگ اسٹون نے اتھاناز کو بولڈ کیا۔ اتھاناز نے 65 گیندوں پر 9 چوکوں اور 2 چھکوں کی مدد سے 66 رنز کی اننگز کھیلی۔ چوتھے نمبر پر آنے والے کپتان شائی ہوپ نے ایک طرف کھڑے ہو کر 83 گیندوں پر 4 چوکوں اور 7 چھکوں کی مدد سے 109* رنز کی ناقابل شکست اننگز کھیلی اور ٹیم کی جیت کو یقینی بنایا۔ اس اننگز میں ان کا اسٹرائیک ریٹ 131.33 تھا۔انگلینڈ کی جانب سے گس اٹکنسن اور ریحان احمد نے 2-2 وکٹیں حاصل کی،جبکہ بریڈن کارس اور لیام لیونگسٹون کو 1-1 سے کامیابی ملی۔سیم کرن ٹیم کے لیے سب سے مہنگے ثابت ہوئے جنہوں نے 10 کی اکانومی کے ساتھ 9.5 اوورز میں 98 رنز لٹادیئے۔