تاثیر،۲۷فروری ۲۰۲۴:- ایس -ایم- حسن
کولکاتا، 27 فروری : کولکاتا کے بیلگھاٹا میں ای ایم بائی پاس کے قریب کاداواڑا علاقے میں واقع کلکتہ جوٹ مل میں منگل کی صبح آگ لگ گئی۔ جوٹ مل میں کچا جوٹ بھرا ہونے کی وجہ سے آگ تیزی سے پھیل گئی۔ اس واقعہ سے گنجان آباد علاقوں میں علی الصبح خوف و ہراس کا ماحول پیدا ہوگیا۔ اطلاع ملتے ہی دس فائر ٹینڈر موقع پر پہنچ گئے۔
فائر ڈپارٹمنٹ کے ایک اہلکار نے بتایا کہ آگ لگنے کی وجہ کے بارے میں فی الحال صورتحال واضح نہیں ہے۔ ابتدائی طور پر قیاس کیا جا رہا ہے کہ آگ شارٹ سرکٹ کی وجہ سے لگی ہو گی۔ واقعے میں کسی کے زخمی ہونے کی کوئی خبر نہیں ہے، تاہم لاکھوں مالیت کا سامان جل کر راکھ ہو گیا ہے۔
فائر بریگیڈ ڈیپارٹمنٹ کے مطابق آگ منگل کی صبح تقریباً 8 بجے لگی۔ ابتدائی طور پر معلوم ہوا ہے کہ آگ جوٹ مل کے تیسرے گودام سے پھیلی ہے۔ آگ لگنے کی وجہ جاننے کے لیے پولیس کے ساتھ مشترکہ ٹیم تشکیل دی جائے گی۔ اس بات کی بھی تحقیقات کی جائیں گی کہ جوٹ مل کے گودام میں آتشزدگی کے واقعات پر قابو پانے کے ٹھوس انتظامات کئے گئے تھے یا نہیں۔