تاثیر،۹مارچ ۲۰۲۴:- ایس -ایم- حسن
سرینگر، 8 مارچ : حریت کانفرنس کے چیئرمین میر واعظ عمر فاروق کو جمعہ کو یہاں کی جامع مسجد میں پانچ ماہ بعد باجماعت نماز ادا کرنے کی اجازت دی گئی۔ حکام نے بتایا کہ میرواعظ کو جمعہ دوپہر یہاں شہر کے نگین علاقے میں واقع ان کی رہائش گاہ سے باہر جانے کی اجازت دی گئی۔ اپنی رہائش گاہ سے نکلنے کے بعد میرواعظ شہر کے نوہٹہ علاقے میں واقع جامع مسجد پہنچے اور وہاں جمعہ کی نماز باجماعت ادا کی۔
میرواعظ کو پہلی بار اگست 2019 میں گھر میں نظر بند رکھا گیا تھا جب مرکز نے آرٹیکل 370 کو منسوخ کر دیا تھا۔ جب کہ انہیں گزشتہ سال ستمبر میں چار سال بعد رہا کر دیا گیا تھا اور انہیں کچھ ہفتوں تک جامع مسجد میں نماز ادا کرنے کی اجازت دی گئی تھی۔ انہیں دوبارہ نظر بند کر دیا گیا تھا۔ غزہ پٹی میں اسرائیلی کارروائی کے خلاف مظاہرے کے مد نظر سرکار کو ایسا کرنا پڑا تھا۔
میرواعظ نے جموں و کشمیر اور لداخ ہائی کورٹ میں اپنی نقل و حرکت پر پابندی کے خلاف درخواست دائر کی تھی۔عدالت نے 21 فروری کو یونین ٹیریٹری انتظامیہ کو اس پر جواب داخل کرنے کا آخری موقع دیا۔