تاثیر،۱۳ اپریل ۲۰۲۴:- ایس -ایم- حسن
ریوا، 13 اپریل: مدھیہ پردیش کے ریوا ضلع میں جمعہ کی شام بورویل کے 60 فٹ گہرے گڑھے میں گرے چھ سالہ معصوم بچے کو 17 گھنٹے کی محنت کے بعد بھی نہیں نکالا جا سکا ہے۔ این ڈی آر ایف اور مقامی انتظامیہ کی پوری ٹیم لگی ہوئی ہے، لیکن اب تک انہیں کامیابی نہیں ملی ہے۔ چار پوکلین اور آٹھ جے سی بی کی مدد سے بورویل کے متوازی کھدائی کی جا رہی ہے۔ ریوا کے کلکٹر-ایس پی سمیت اعلیٰ افسران رات بھر موقع پر موجود رہے۔
معلومات کے مطابق ریوا ضلع کے جنیہ تھانہ علاقے کے تحت منیکا گاوں کے مقامی باشندے وجے کمار قبائلی کا چھ سالہ بیٹا مینک جمعہ کی شام چار بجے اپنے گھر کے قریب کھیتوں میں دوستوں کے ساتھ کھیل رہا تھا۔ اسی دوران مینک اچانک بورویل کے گڑھے میں گر گیا۔ گھر والوں نے فوری طور پر پولیس کو واقعہ کی اطلاع دی۔
واقعہ کی اطلاع ملتے ہی تیونتھر کے ایس ڈی ایم سنجے جین فوری طور پر ریسکیو ٹیم اور پولیس فورس کے ساتھ جائے حادثہ پر پہنچے اور راحت اور بچاو کام شروع کیا۔ شام کو ریوا سے این ڈی آر ایف کی ٹیم بھی موقع پر پہنچ گئی اور راحت اور بچاو کا کام شروع کیا۔ بچہ بورویل کے گڑھے میں 60 فٹ کی گہرائی میں پھنس گیا ہے۔ اسے بچانے کے لیے 17 گھنٹے سے ریسکیو جاری ہے۔
ایس ڈی ایم سنجے جین نے بتایا کہ بورویل تقریباً 160 فٹ گہرا ہے، پوکلین مشین کے ذریعے دونوں طرف سے مسلسل کھدائی کی جا رہی ہے۔ بچے کو مسلسل آکسیجن دی جا رہی ہے۔ بچے کو بحفاظت باہر نکالنے کے لیے جنگی بنیادوں پر کوششیں جاری ہیں۔ بچے کے علاج کے لیے ایمبولینس کے ساتھ میڈیکل ٹیم بھی موقع پر تعینات ہے۔ ضرورت پڑنے پر ریسکیو کام کے لیے ماہر ٹیمیں بلانے کا انتظام کیا جائے گا۔ کلکٹر پرتیبھا پال اور سپرنٹنڈنٹ آف پولیس وویک سنگھ موقع پر پہنچ کر راحت اور بچاو کے کام کی مسلسل نگرانی کر رہے ہیں۔