دربھنگہ بائی پاس ہالٹ پر اسپیڈ ٹرائل آج

دربھنگہ 20 ستمبر (فضا امام):-دربھنگہ بائی پاس ہالٹ پر اسپیڈ ٹرائل آج ہوگا۔ ایسٹرن ریلوے کے سی اے او (چیف ایڈمنسٹریٹو آفیسر) رام جنم نے اسپیڈ ٹرائل کے لیے ٹریک کا مکمل معائنہ کیا۔چیف ایڈمنسٹریٹو آفیسر نے انجینئروں کی ٹیم کے ساتھ کاکڑگھٹی سے شیشو ہالٹ تک کا معائنہ کیا۔ معلوم ہوا ہے کہ اسپیڈ ٹرائل میں نئی ریلوے لائن پر صرف انجن کو 120 کلومیٹر فی گھنٹہ کی رفتار سے چلایا جاتا ہے اور پھر انجن گزرنے کے بعد ریلوے ٹریک کو چیک کیا جاتا ہے۔ جہاں کہیں کوئی خرابی پائی جاتی ہے، اسے فوراً دور کر دیا جاتا ہے۔ اس کے بعد آمدورفت کا عمل دوبارہ شروع کیا جاتا ہے۔بتادیں کہ دربھنگہ بائی پاس ہالٹ سے ٹرینوں کا آپریٹنگ شروع کرنے کے لیے محکمانہ تیاریاں تیز کر دی گئی ہیں۔ اس سے پہلے بھی انجینئروں کی ٹیم نے شیشو سے کاکڑگھٹی اسٹیشن تک ٹرالی کے ذریعے معائنہ کیا تھا۔ وقتاً فوقتاً ٹرالی کو روک کر انجینئروں کی ٹیم نے ہر چیز کا تفصیلی معائنہ کیا اور پھر اس سے متعلق تکنیکی خامیوں کو دور کرنے کے لیے کام کرنے کا حکم دیا۔ مسافر دربھنگہ بائی پاس ہالٹ سے ٹرینوں کے چلانے کا بے صبری سے انتظار کر رہے ہیں۔ یہاں ٹرینیں چلنے کے بعد وقت بچ جائے گا۔ دربھنگہ جنکشن پر ٹرینوں کا دباؤ بھی کم ہوگا۔