تاثیر ۱۹ ستمبر ۲۰۲۴:- ایس -ایم- حسن
میرٹھ، 19 ستمبر: مظفر نگر ضلع کے کھتولی علاقے میں جمعرات کو دہلی پولیس کے اسپیشل سیل اور یوپی ایس ٹی ایف کے شرپسندوں کے ساتھ انکاؤنٹر ہوا۔ اس میں ہاشم بابا گینگ کے دو شارپ شوٹر زخمی ہوئے۔ یہ دونوں شارپ شوٹر دہلی میں افغان جم کے مالک نادر کے قتل میں مطلوب تھے۔
یوپی ایس ٹی ایف کے میرٹھ یونٹ کے اے ایس پی برجیش سنگھ کے مطابق اطلاع ملی تھی کہ ہاشم بابا گینگ کے شارپ شوٹر انس اور اسد دہلی-این سی آر میں گھوم رہے ہیں۔ دہلی پولیس کے اسپیشل سیل اور ایس ٹی ایف کی ٹیم نے ان شوٹروں کا پیچھا کرنا شروع کردیا۔ جمعرات کی صبح دونوں ٹیموں نے مظفر نگر ضلع کے کھتولی تھانہ علاقے کے بھینسی گاؤں کے قریب شرپسندوں کو روکنے کی کوشش کی۔ ان شرپسندوں نے پولیس ٹیم پر فائرنگ شروع کر دی۔ دہلی پولیس اور ایس ٹی ایف کی جوابی فائرنگ میں دونوں شرپسندوں کی ٹانگوں میں گولیاں لگنے سے زخمی ہوئے۔
زخمی اسد امین ساکن چوہان بنگر برہم پوری دہلی کے خلاف دہلی اور یوپی میں پانچ مقدمات درج ہیں اور انس خان ساکن چوہان بنگر دہلی کے خلاف دہلی اور یوپی میں چھ مقدمات درج ہیں۔ ان شرپسندوں سے ایک کار، تین پستول اور نو کارتوس برآمد ہوئے ہیں۔ یہ دونوں ہاشم بابا گینگ کے شارپ شوٹر ہیں۔ ہاشم بابا اس وقت دہلی کی تہاڑ جیل میں بند ہیں اور جیل سے ہی اپنا گینگ چلا رہے ہیں۔ کہا جاتا ہے کہ ہاشم بابا گینگسٹر لارنس وشنوئی کے لیے کام کر رہا ہے۔ یہ دونوں شوٹر 17 ستمبر کو دہلی میں افغان نژاد جم مالک نادر شاہ کے قتل میں مطلوب تھے۔ زخمی شرپسندوں کو اسپتال میں داخل کرایا گیا ہے۔ اس سے پوچھ گچھ کی جا رہی ہے۔ شرپسندوں کے خلاف تھانہ کھتولی میں مقدمہ درج کر لیا گیا ہے۔