تاثیر 31 دسمبر ۲۰۲۴:- ایس -ایم- حسن
بھوپال، 31 دسمبر: ریٹائرڈ انڈین ایڈمنسٹریٹو سروس (آئی اے ایس) افسر (ایڈیشنل چیف سکریٹری) منوج شریواستو کو ریاستی حکومت نے مدھیہ پردیش کا نیا ریاستی الیکشن کمشنر مقرر کیا ہے۔ جنرل ایڈمنسٹریشن ڈپارٹمنٹ نے منگل کی دیر شام اس سلسلے میں ایک حکم نامہ جاری کیا ہے۔
دراصل ریٹائر ہونے والے ریاستی الیکشن کمشنر بسنت پرتاپ سنگھ کی 6 ماہ کی اضافی مدت 31 دسمبر کو مکمل ہو گئی ہے۔ اس سے قبل ریاستی الیکشن کمشنر رہے بی پی سنگھ کی میعاد 30 جون 2024 کو ختم ہوئی تھی۔ اس کے بعد حکومت نے کسی نئے کمشنر کی تقرری کے بجائے بی پی سنگھ کو اس عہدے پر برقرار رہنے کے احکامات جاری کیے تھے۔ اس میں کہا گیا تھا کہ ریاستی الیکشن کمشنر اپنی میعاد پوری ہونے کے بعد 6 ماہ تک عہدے پر رہ سکتے ہیں۔ منگل کو ان کی اضافی میعاد پوری ہونے کے بعد ریاستی حکومت نے ریاستی الیکشن کمشنر کے عہدے پر نئی تقرری کے احکامات جاری کیے ہیں۔