تاثیر 07 فروری ۲۰۲۵:- ایس -ایم- حسن
ارریہ 7 فروری:- ( مشتاق احمد صدیقی ) چیف منسٹرگرلز کینسر امیونائزیشن اسکیم کے تحت ضلع میں ایچ پی وی ویکسینیشن پروگرام کا افتتاح اسکولی لڑکیوں کے ذریعہ صدر اسپتال ارریہ میں ڈسٹرکٹ آفیسر ارریہ شری انیل کمار اور دیگر صحت افسران کی موجودگی میں کیا گیا۔ مہم کے پہلے دن کل 20 لڑکیوں کو ایچ پی وی کے ٹیکے لگائے گئے۔ ان میں جواہر نوودیا ودیالیہ، گورنمنٹ گرلز مڈل اسکول چاندنی چوک اور گرلز مڈل اسکول کھریا بستی کی لڑکیاں شامل تھیں۔ اس موقع پر ضلع مجسٹریٹ نے کہا کہ یہ HPV یعنی ہیومن پیپیلوما وائرس سے تحفظ کا ایک اہم ذریعہ ہے۔
چیف منسٹر گرلز کینسر امیونائزیشن اسکیم کے تحت ضلع میں 9 سے 14 سال کی لڑکیوں کو سروائیکل کینسر سے بچاؤ کے ٹیکے لگائے جا رہے ہیں۔ فی الحال ضلع میں HPV ویکسینیشن پروگرام کے تحت 360 لڑکیوں کو ٹیکے لگانے کا ہدف ہے۔ ویکسینیشن پروگرام افتتاح کے دن سے شروع کر دیا گیا ہے۔ مقررہ عمر کے گروپ کی تمام لڑکیوں کو ترتیب وار طور پر ٹیکہ لگایا جانا ہے۔ تاکہ ان لڑکیوں کو مستقبل میں HPV کے کسی خطرے کا سامنا نہ کرنا پڑے۔ اس ویکسین کے کوئی مضر اثرات( سائڈ افیکٹ) نہیں ہیں۔HPV ویکسین مکمل طور پر محفوظ ہے۔ ڈی آئی او کم اے سی ایم او ڈاکٹر معیز نے کہا کہ ایچ پی وی ویکسینیشن مہم نوعمر لڑکیوں کی صحت کی حفاظت کے معاملے میں بہار حکومت کی ایک اہم پہل ہے، جو انہیں کینسر سے بچاؤ کے لئے مستقبل میں صحت مند زندگی میں مدد دے گا۔
انہوں نے کہا کہ مہم کے پہلے مرحلے میں مختلف سرکاری اسکولوں کی بچیوں کو ترجیحی بنیادوں پر پولیو کے قطرے پلانے کا منصوبہ ہے۔ اس کے بعد پرائیویٹ اسکولوں میں زیر تعلیم نوعمر لڑکیوں کو بھی مہم میں شامل کیا جائے گا۔ ایچ پی وی ویکسین کو لڑکیوں کے محفوظ مستقبل اور صحت مند زندگی کے لئے اہم قرار دیتے ہوئے انہوں نے لوگوں سے اپیل کی کہ وہ اجتماعی کوششوں سے اس مہم کو کامیاب بنائیں۔
سول سرجن ڈاکٹر کے کے کشیپ نے کہا کہ مہم کی کامیابی کے لئے مختلف سطحوں پر ضروری کوششیں کی جارہی ہیں۔ اس سلسلے میں متعلقہ حکام کو ضروری ہدایات دے دی گئی ہیں۔ مہم کے بارے میں لوگوں کو آگاہ کیا جا رہا ہے۔ تاکہ زیادہ سے زیادہ نوعمر لڑکیوں کو ٹیکے لگوا کر ان کا مستقبل محفوظ ہو سکے۔ ویکسینیشن سے انہیں سروائیکل کینسر جیسی سنگین بیماری سے بچانا ممکن ہو جائے گا۔ محکمہ صحت انتظامیہ مہم کی کامیابی کے لئے سنجیدہ ہے۔ اس سلسلے میں ضروری تیاریاں کر لی گئی ہیں۔ اس موقع پر سول سرجن ڈاکٹر کے کے کشیپ، ڈی آئی او کم اے سی ایم او ڈاکٹر معیز، اسپتال کے انچارج سپرنٹنڈنٹ ڈاکٹر آکاش کمار رائے، ڈی پی ایم مسٹر سنتوش کمار، ایس ایم سی یونیسف مسٹر آدتیہ کمار سنگھ، ڈبلیو ایچ او آر آر ٹی ڈاکٹر جنید شفاعت، یو این ڈی پی وی سی سی ایم شکیل اعظم، ہیلتھ منیجر مسٹر وکاس آنند اور دیگر محکمہ صحت کے افسران موجود تھے۔