تاثیر 28 اپریل ۲۰۲۵:- ایس -ایم- حسن
نئی دہلی، 28 اپریل: آیوشمان بھارت پردھان منتری ویا وندنا یوجنا کا آغاز کرتے ہوئے، دہلی کی وزیر اعلیٰ ریکھا گپتا اور مرکزی وزیر ہردیپ سنگھ پوری نے پیر کو دارالحکومت کے بزرگ شہریوں میں کارڈ تقسیم کیے۔ اس اسکیم کے تحت پہلا کارڈ رام سنگھ نیگی کو، دوسرا وید سنگھ کو اور تیسرا راجندر کمار اور کئی دوسرے لوگوں کو دیا گیا۔ کارڈ کی تقسیم کی مرکزی تقریب دہلی کے تیاگ راج اسٹیڈیم میں منعقد ہوئی۔
اس موقع پر دہلی حکومت کے تمام وزراء، دہلی کے تمام بی جے پی ممبران پارلیمنٹ، قانون ساز اسمبلی کے ڈپٹی اسپیکر موہن سنگھ بشٹ اور دہلی کے میئر راجہ اقبال سنگھ اور ڈپٹی میئر جئے بھگوان یادو موجود تھے۔ وزیراعلیٰ نے کہا کہ ٹرپل انجن والی حکومت کا یہ پہلا پروگرام ہے۔ انہوں نے کہا کہ آج دہلی کے بزرگوں کو نئی زندگی ملی ہے۔ اب انہیں صحت اور علاج کے حوالے سے کوئی پریشانی اور بے بسی نہیں ہونی چاہیے۔ اس آیوشمان ویا وندنا کارڈ سے بزرگوں کو عزت اور صحت دونوں ملتی ہیں۔ بزرگ اب بوجھ نہیں رہے، وہ قوم کا فخر ہیں۔ آیوشمان بھارت پردھان منتری جن آروگیہ یوجنا (اے بی پی ایم۔جے اے وائی) کے تحت آیوشمان ویا وندنا کارڈ 70 سال یا اس سے زیادہ عمر کے بزرگ شہریوں کو مفت صحت کی سہولیات فراہم کرتا ہے۔ بزرگ شہریوں کو اے بی پی ایم۔جے اے وائی پینل ہسپتالوں میں علاج کے لیے ہر سال 10 لاکھ روپے تک کا ہیلتھ کور ملے گا۔