تاثیر 12 اپریل ۲۰۲۵:- ایس -ایم- حسن
ہوڑہ، 12 اپریل (محمد نعیم) مشرقی ریلوے کے ہوڑہ ڈویژن نے رِشڑا، بنڈیل اور کمار کنڈو ریلوے اسٹیشنوں اور ان کے آس پاس کے علاقوں میں صفائی اور حفظانِ صحت کو فروغ دینے کے لیے ایک جامع آگاہی مہم کا انعقاد کیا۔
یہ مہم ڈویژن کے “انوائرمنٹ اینڈ ہاؤس کیپنگ مینجمنٹ (EnHM)” شعبہ کی قیادت میں کی گئی، جس میں چیف ہیلتھ انسپکٹر (CHI)، ریلوے پروٹیکشن فورس (RPF) اور مقامی دکانداروں نے بھرپور حصہ لیا۔ مہم کا مقصد مسافروں، ریلوے کے صارفین اور اسٹیشن پر کام کرنے والے افراد کو کوڑا کرکٹ درست طریقے سے ٹھکانے لگانے، گندگی نہ پھیلانے، اور ریلوے احاطے میں تھوکنے کی ممانعت کے حوالے سے شعور دینا تھا۔
پلاسٹک آلودگی کے سنگین مسئلے پر خاص زور دیا گیا۔ افسران نے مسافروں کو پلاسٹک کے فضلے کے ماحول اور صحت پر پڑنے والے مضر اثرات سے آگاہ کیا اور انہیں ماحول دوست متبادل اپنانے کی ترغیب دی۔ لوگوں کو ریلوے اسٹیشن پر موجود مخصوص کوڑے دانوں کا استعمال کرنے، اور ری یوز ایبل تھیلے، بوتلیں، اور برتن استعمال کرنے کی تلقین کی گئی۔
مشرقی ریلوے کا ہاوڑہ ڈویژن صفائی اور پائیداری کے فروغ کے لیے اپنی حدود میں ایسی آگاہی مہمات مسلسل جاری رکھنے کے عزم پر قائم ہے۔