تاثیر 12 اپریل ۲۰۲۵:- ایس -ایم- حسن
لندن، 12 اپریل: پاکستان کے وزیر اعظم شہباز شریف گزشتہ روز لندن پہنچے۔ بیلاروس کا دورہ مکمل کر کے لندن پہنچنے والے شہباز دو دن قیام کا ارادہ رکھتے ہیں۔ ان کے بڑے بھائی مسلم لیگ ن کے صدر اور سابق وزیراعظم نواز شریف دو ہفتے کے دورے پر ہفتے کو برطانوی دارالحکومت پہنچیں گے۔ وزیراعظم شہباز شریف شام کو لیوٹن ایئرپورٹ پر اترے۔ شہباز شریف کا آج لندن میں طبی معائنہ ہونا ہے۔
دی نیوز انٹرنیشنل کے مطابق وزیراعظم شہباز شریف اسلام آباد میں اوورسیز پاکستانیز کانفرنس میں شرکت کے لیے اتوار کی شب وطن واپس پہنچیں گے۔ مسلم لیگ (ن) کے ذرائع کا کہنا ہے کہ وزیراعظم آج میڈیکل چیک اپ کے لیے جائیں گے اور اتوار کو ان کی دو میٹنگ ہوں گی۔ وہ کئی برسوں سے لندن میں ہیلتھ چیک اپ کروا رہے ہیں۔ وطن روانگی سے قبل وزیراعظم ایون فیلڈ فلیٹس میں اپنے بڑے بھائی نواز شریف سے ملاقات کریں گے۔