تاثیر 11 اکتوبر ۲۰۲۵:- ایس -ایم- حسن
چنئی، 11 اکتوبر: تمل ناڈو میں جمعہ کی رات دیر گئے اس وقت ایک بڑا ہوائی حادثہ ٹل گیا جب مدور ئی سے چنئی آ رہے ایک پرائیویٹ ایئر لائن کے طیارے کی ونڈ شیلڈ پرواز کے دوران ہی چٹک گئی ۔
پائلٹ کی چوکسی اور ایئر ٹریفک کنٹرول (اے ٹی سی) کی مستعدی سے طیارے کو محفوظ طریقے سے لینڈ کرا لیا گیا۔ جہاز میں کل 79 مسافر سوار تھے۔
انڈیگو ایئر لائنز کا ایک چھوٹا اے ٹی آر مسافر طیارہ مدور ئی ہوائی اڈے سے اڑان بھرا۔ لینڈنگ سے کچھ دیر پہلے پائلٹ نے کاک پٹ کے شیشے میں شگاف دیکھا۔ صورتحال کی سنگینی کو سمجھتے ہوئے پائلٹ نے فوری طور پر ایئر ٹریفک کنٹرولر کو اطلاع دی۔ اطلاع ملنے پر اے ٹی سی ٹیم فوری طور پر حرکت میں آگئی اور محفوظ لینڈنگ کے لیے تمام ضروری ہدایات فراہم کیں۔ طیارہ کچھ دیر بعد چنئی ایئرپورٹ پر بحفاظت اتر گیا۔ جہاز میں سوار تمام 79 مسافر محفوظ ہیں۔