تاثیر 12 اکتوبر ۲۰۲۵:- ایس -ایم- حسن
ممبئی، 12 اکتوبر ساکی ناکہ پولیس نے 7 اکتوبر کو پیش آئے ایک لرزہ خیز واقعے میں 45 سالہ مزدور ساتھی کے قتل کے الزام میں تین افراد کو گرفتار کر لیا۔ پولیس کے مطابق ملزمین نے اپنے ساتھی احسان علی انصاری کو مبینہ طور پر اغوا کرنے کے بعد قتل کیا اور اس کی لاش چمبور کے علاقے میں ٹھکانے لگا دی۔ یہ تمام افراد ساکی ناکہ کے ایک ہی علاقے میں رہائش پذیر تھے۔تحقیقات سے معلوم ہوا کہ مقتول کی وجہ سے تینوں کو اپنے روزگار سے ہاتھ دھونا پڑا تھا۔ چاروں ہاتھ گاڑی کے ذریعہ دکانوں اور گوداموں میں سامان لانے اور لے جانے کا کام کرتے تھے۔ پچھلے چند مہینوں سے زیادہ تر کام احسان علی کو مل رہا تھا، جس پر ان کے تین ساتھی ناراض تھے۔ اسی رنجش نے انہیں قتل پر آمادہ کیا۔
پولیس کے مطابق انصاری کے قتل کے بعد ملزمین نے وہ رقم بھی لوٹ لی جو اس نے اپنی بیٹی کی منگنی کے لیے اتر پردیش بھیجنے کی غرض سے جمع کی تھی۔ 7 اکتوبر کو تینوں نے احسان علی کو کام کے نئے مواقع کے بہانے بھیونڈی آنے کی دعوت دی۔ جب وہ دو دن تک واپس نہیں آیا تو اس کا بھائی 38 سالہ منور علی نے پولیس میں شکایت درج کرائی۔