ڈی ایم رچی پانڈے کا مثالی قدم، چار ماہ میں دوسری بار خون کا عطیہ

سیتامڑھی: (مظفر عالم)

ڈسٹرکٹ مجسٹریٹ و چیئرمین، انڈین ریڈ کراس سوسائٹی سیتامڑھی، رچی پانڈے نے ریڈ کراس بلڈ بینک میں رضاکارانہ طور پر خون کا عطیہ دے کر سماج کے سامنے ایک مثالی مثال پیش کی ہے۔ خاص بات یہ ہے کہ انہوں نے محض چار ماہ کے اندر دوسری بار خون دے کر عوام کو انسانیت کی خدمت کے لیے ترغیب دی ہے۔ ریڈ کراس کے سکریٹری راجیش کمار سندرکا نے بتایا کہ ڈی ایم کی جانب سے بار بار خون دینے کا عمل عوام میں بیداری پیدا کرے گا اور اس کے دور رس اثرات مرتب ہوں گے۔ انہوں نے کہا کہ ضرورت مند افراد کی جان بچانے کے لیے خون کا عطیہ نہایت ضروری ہے اور اس سے عطیہ دینے والا خود بھی صحت مند رہتا ہے۔

اس موقع پر ڈی ایم رچی پانڈے نے کہا کہ خون کا عطیہ ایک مقدس اور اہم عمل ہے، اور وہ ہمیشہ اس میں خود حصہ لینے کی کوشش کرتے ہیں۔ انہوں نے بتایا کہ اسپتالوں میں حاملہ خواتین، خون کی کمی (اینیمیا) کے مریضوں، آپریشن اور ٹراما کیسز میں مسلسل خون کی ضرورت رہتی ہے، اس لیے بلڈ بینک میں خون کی وافر مقدار میں دستیابی بہت ضروری ہے۔

انہوں نے ضلع کے تمام صحت مند شہریوں، خاص طور پر نوجوانوں سے اپیل کی کہ وہ آگے بڑھ کر خون کا عطیہ کریں، کیونکہ کسی کو معلوم نہیں کہ کب اور کس کو خون کی ضرورت پڑ جائے۔ انہوں نے تھیلیسیمیا اور دیگر ضرورت مند مریضوں کے لیے بھی خون دینے کی اپیل کی۔ اس موقع پر معاون سکریٹری سنجے سنہا، ایگزیکٹو ممبران گھنشام ویاس، ابھیے پرساد اور امیت جھا بھی موجود تھے۔ خون دینے کے بعد ڈی ایم کو پھولوں کا گلدستہ، مومنٹو اور سرٹیفکیٹ دے کر شکریہ ادا کیا گیا۔

بلڈ ڈونیشن کو کامیاب بنانے میں لیب ٹیکنیشن جیویش کمار مشرا اور سنیل کمار کا اہم کردار رہا۔