نیا ٹورسٹ ہاٹ اسپاٹ، منیکا من جھیل بنے گی جدید پکنک ڈیسٹینیشن

مظفر پور (نزہت جہاں)

ضلع کے باشندوں کے لیے بڑی خوشخبری ہے۔ شہر سے متصل مسہری  بلاک   کے منیکا مین کو اب ایک جدید سیاحتی مرکز کے طور پر ترقی دی جا رہی ہے۔ ضلع انتظامیہ کی اس اہم پہل پر تیزی سے کام جاری ہے، جو آنے والے وقت میں اسے بہترین پکنک اور سیاحت کا اہم مقام بنا دے گا۔

تقریباً 124.26 ایکڑ رقبے پر محیط اس پروجیکٹ کا پہلا مرحلہ تیزی سے مکمل کیا جا رہا ہے۔ اس میں مرکزی عمارت، خوبصورت فیچر وال، آرام دہ نشستیں، سینٹرل پلازہ، آبی ذخیرہ، دکانیں اور شاندار داخلی دروازہ تعمیر کیا جا رہا ہے۔ اس پورے منصوبے کو اس طرح ڈیزائن کیا گیا ہے کہ قدرتی خوبصورتی کے ساتھ جدید سہولیات کا بہترین امتزاج نظر آئے۔

یہ پروجیکٹ صرف سیاحت تک محدود نہیں ہوگا بلکہ اسے ثقافتی اور روزگار فراہم کرنے والے مرکز کے طور پر بھی تیار کیا جا رہا ہے۔ یہاں بننے والی جبا سہنی آرٹ گیلری مقامی فنکاروں کو پلیٹ فارم فراہم کرے گی، جبکہ شاپنگ ایریا اور دیگر تجارتی سرگرمیاں مقامی لوگوں کے لیے روزگار کے مواقع پیدا کریں گی۔ سیاحوں کی دلچسپی کے لیے بوٹنگ، واٹر اسپورٹس اور لیک فرنٹ جیسی جدید سہولیات فراہم کی جائیں گی۔ اہلِ خانہ کے لیے چلڈرن پارک، سرسبز باغات اور کھلے مقامات بھی تیار کیے جا رہے ہیں۔ مستقبل میں یہاں ہوٹل، ریستوراں اور میرج ہال جیسی سہولیات بھی قائم کی جائیں گی، جہاں لوگ روایتی بہاری کھانوں سے لطف اندوز ہو سکیں گے۔ لوکیشن کے لحاظ سے بھی یہ مقام خاص اہمیت رکھتا ہے۔ یہ جھیل ضلع ہیڈکوارٹر سے تقریباً 8 کلومیٹر اور مجوزہ فور لین سڑک سے صرف 1.5 کلومیٹر کی دوری پر واقع ہے، جس کی وجہ سے یہاں پہنچنا نہایت آسان ہوگا۔ بہتر کنیکٹیویٹی کے باعث یہ جگہ جلد ہی ویک اینڈ ڈیسٹینیشن کے طور پر ابھر سکتی ہے۔‌ پروجیکٹ مکمل ہونے کے بعد منیکا من جھیل نہ صرف مظفرپور بلکہ پورے ترہت علاقے کا ایک اہم سیاحتی مرکز بن جائے گا، جہاں لوگ سکون، تفریح اور ثقافت—تینوں کا بھرپور لطف اٹھا سکیں گے۔