تاثیر 11 مئی ۲۰۲۶:- ایس -ایم- حسن
لداخ، 11 مئی: لداخ کے ضلع لیہہ کے بعد اب زنسکار میں بھی بھگوان بدھ کی مقدس یادگاریں پہنچنے پر روحانی اور مذہبی ماحول قائم ہو گیا ہے۔ پیر کی صبح بھارتی فضائیہ کے ہیلی کاپٹر کے ذریعے ان مقدس تبرکات کو زنسکار لایا گیا، جہاں مقامی عوام اور بدھ مذہبی تنظیموں نے ان کا پرتپاک استقبال کیا۔ زنسکار ہیلی پیڈ پر لداخ بدھسٹ ایسوسی ایشن اور لداخ گومپا ایسوسی ایشن کے نمائندوں کے علاوہ اسکولی بچوں اور مقامی باشندوں نے روایتی لباس میں مقدس یادگاروں کا خیرمقدم کیا۔
اس موقع پر مذہبی رسومات، ثقافتی پروگرام اور خصوصی دعائیہ تقریبات بھی منعقد کی گئیں۔ یہ مقدس یادگاریں 12 مئی تک زنسکار میں عوامی درشن کے لیے رکھی جائیں گی، جہاں کرگل، دراس اور دیگر علاقوں سے بڑی تعداد میں عقیدت مندوں اور سیاحوں کی آمد متوقع ہے۔ مقدس یادگاروں میں 1898 میں پپراہوا میں کھدائی کے دوران برآمد ہونے والی چھٹی صدی قبل مسیح کی نوادرات، مجسمے، مخطوطات اور تھانگکا شامل ہیں۔ ضلع انتظامیہ نے ان کی نمائش کے لیے تمام ضروری انتظامات مکمل کیے ہیں۔
واضح رہے کہ یہ مقدس یادگاریں 30 اپریل کو لیہہ پہنچی تھیں، جہاں یکم مئی کو منعقدہ ایک تقریب میں مرکزی وزیر داخلہ امت شاہ نے بھی شرکت کی تھی۔ بعد ازاں ہزاروں عقیدت مندوں، سیاحوں اور مختلف ممالک کے سفیروں نے ان مقدس تبرکات کے درشن کیے۔ اطلاعات کے مطابق 13 مئی کو ان مقدس یادگاروں کو دوبارہ لیہہ منتقل کیا جائے گا جبکہ 15 مئی کو انہیں واپس دہلی لے جایا جائے گا۔ یہ پہلی بار ہے کہ پپراہوا کی ان مقدس یادگاروں کو ملک کے کسی دوسرے حصے میں عوامی نمائش کے لیے پیش کیا گیا ہے۔