اب دفتر کے چکر نہیں… حکومت خود گاؤں پہنچ رہی ہے

عوامی مسائل کا بروقت حل حکومت کی اولین ترجیح” دلیپ جیسوال

مظفرپور (نزہت جہاں)

ضلع میں منعقد کیے جا رہے “تعاون کیمپ” اب عوام کے لیے امید اور اعتماد کا مضبوط ذریعہ بنتے جا رہے ہیں۔ محکمہ مال و اراضی اصلاحات کے معزز وزیر اور ضلع انچارج وزیر  دلیپ جیسوال نے مسہری، میناپور اور کُڑھنی بلاکوں میں لگائے گئے تعاون کیمپوں کا معائنہ کرتے ہوئے واضح کہا کہ حکومت عوامی مسائل کے حل کے لیے پوری طرح سنجیدہ ہے اور ہر شکایت کا بروقت اور معیاری ازالہ یقینی بنایا جائے گا۔ وزیر موصوف نے اپنے دورے کا آغاز مسہری بلاک کے جمال آباد پنچایت میں منعقد تعاون کیمپ سے کیا، جہاں انہوں نے ضلع مجسٹریٹ سبرت کمار سین اور سینئر پولیس سپرنٹنڈنٹ کے ساتھ مشترکہ طور پر چراغ روشن کرکے کیمپ کا افتتاح کیا۔ اس کے بعد انہوں نے 18 مختلف محکموں کے اسٹالوں کا جائزہ لیا اور افسران سے موصول درخواستوں اور ان کے حل کی تفصیلات حاصل کیں۔معائنہ کے دوران وزیر نے افسران کو ہدایت دی کہ کیمپ میں آنے والے ہر شخص کے مسئلے کو سنجیدگی سے حل کیا جائے اور کسی بھی فائدہ اٹھانے والے کو غیر ضروری پریشانی کا سامنا نہ کرنا پڑے۔ انہوں نے کہا کہ وزیر اعلیٰ کی قیادت میں حکومت انتظامیہ کو گاؤں گاؤں تک پہنچانے کے لیے مسلسل کام کر رہی ہے تاکہ عوام کو دفاتر کے چکر نہ لگانے پڑیں۔ اس موقع پر وزیر نے شجرکاری بھی کی اور ماحولیات کے تحفظ کو سماجی ذمہ داری قرار دیتے ہوئے عوام سے زیادہ سے زیادہ پودے لگانے کی اپیل کی۔ انہوں نے کہا کہ ترقی اور ماحولیات کا تحفظ ساتھ ساتھ چلنا چاہیے۔

اپنے خطاب میں وزیر نے کسانوں کی خوشحالی، نوجوانوں کو روزگار، خواتین کو بااختیار بنانے اور جرائم سے پاک سماج کے قیام کو حکومت کی ترجیح بتایا۔ انہوں نے والدین سے اپیل کی کہ وہ اپنے بچوں کو اچھے اخلاق اور نظم و ضبط کی تعلیم دیں کیونکہ باکردار شہری ہی مضبوط سماج اور ترقی یافتہ ملک کی بنیاد ہوتے ہیں۔پروگرام کے دوران مختلف سرکاری اسکیموں کے مستحقین میں امداد اور اسناد بھی تقسیم کی گئیں۔ جیونیکا سیلف ہیلپ گروپ کی پانچ خواتین کو مجموعی طور پر 74 لاکھ روپے کا چیک فراہم کیا گیا۔ اس کے علاوہ پانچ مزدوروں کو جاب کارڈ، 15 بزرگوں کو چشمہ، تین معذور افراد کو ٹرائی سائیکل اور 10 مستحقین کو KYP سرٹیفکیٹ دیے گئے۔ اعداد و شمار کے مطابق جمال آباد تعاون کیمپ میں کل 345 درخواستیں موصول ہوئیں، جن میں سے 327 درخواستوں کا حل کر دیا گیا ہے، جبکہ باقی معاملات پر تیزی سے کارروائی جاری ہے۔ بعد ازاں وزیر نے  میناپور کے دھرم پور پنچایت اور کُڑھنی کے خروانادیہ میں منعقد تعاون کیمپوں کا بھی معائنہ کیا۔ دیہی عوام نے خوشی کا اظہار کرتے ہوئے کہا کہ پہلی بار انتظامیہ اور عوامی نمائندے خود گاؤں پہنچ کر ان کے مسائل سن رہے ہیں اور فوری حل بھی فراہم کر رہے ہیں۔ ضلع مجسٹریٹ سبرت کمار سین نے بتایا کہ تعاون کیمپوں کی کامیابی کے لیے مسلسل جائزہ میٹنگیں، “تعاون سیل” کا قیام اور مضبوط نگرانی نظام نافذ کیا گیا ہے تاکہ ہر درخواست کا شفاف اور بروقت حل یقینی بنایا جا سکے۔