تاثیر 14 جولائی ۲۰۲۶:- ایس -ایم- حسن
نئی دہلی، 14 جولائی :۔ اٹلانٹا میں بدھ کے روز (بھارتی وقت کے مطابق 16 جولائی، جمعرات کی رات 12:30 بجے، یعنی 15 جولائی کی دیر رات) فیفا ورلڈ کپ کا دوسرا سیمی فائنل کھیلا جائے گا، جس میں انگلینڈ اور ارجنٹینا آمنے سامنے ہوں گے۔ دونوں ٹیموں کی نظریں فائنل میں جگہ بنانے پر مرکوز ہوں گی، جبکہ فٹبال کی دنیا کی سب سے مشہور حریفیوں میں سے ایک کا ایک نیا باب بھی رقم ہوگا۔
یہ مقابلہ صرف موجودہ ورلڈ کپ کی جنگ نہیں بلکہ کئی دہائیوں پر محیط تاریخی رقابت کا بھی تسلسل ہے۔ 1966 کے ورلڈ کپ میں انتونیو راٹین کو متنازع ریڈ کارڈ دکھائے جانے سے لے کر 1986 میں ڈیاگو میراڈونا کے مشہور “ہینڈ آف گاڈ” اور “گول آف دی سینچری”، پھر 1998 میں ڈیوڈ بیکہم کے ریڈ کارڈ اور 2002 میں ان کی پنالٹی کے ذریعے انگلینڈ کی فتح تک، دونوں ممالک کے درمیان ہر مقابلہ یادگار رہا ہے۔
اس بار اس مقابلے کی سب سے بڑی خاص بات یہ ہے کہ لیونل میسی اپنے طویل بین الاقوامی کیریئر میں پہلی مرتبہ انگلینڈ کے خلاف کوئی باضابطہ سینئر میچ کھیلیں گے۔ 39 سالہ میسی اس ورلڈ کپ میں آٹھ گول کر چکے ہیں اور موجودہ چیمپئن ارجنٹینا کو مشکل حالات سے نکالنے میں کلیدی کردار ادا کر رہے ہیں۔ مصر اور سوئٹزرلینڈ کے خلاف سخت مقابلوں میں بھی ارجنٹینا نے کامیابی حاصل کی۔
تاہم اب ارجنٹینا صرف میسی پر انحصار نہیں کرتا۔ جولیان الواریز نے گزشتہ دو ناک آؤٹ مقابلوں میں لاوتارو مارٹینیز کی جگہ کھیلتے ہوئے شاندار کارکردگی کا مظاہرہ کیا ہے۔ دوسری جانب انگلینڈ کی امیدیں کپتان ہیری کین اور جوڈ بیلنگھم سے وابستہ ہوں گی۔ دونوں کھلاڑی اس ورلڈ کپ میں مجموعی طور پر 12 گول کر چکے ہیں اور ٹیم کو کئی مشکل مقابلوں میں کامیابی دلانے میں اہم کردار ادا کیا ہے۔