’’ہماری کلیکٹر دیدی‘‘ نے طلبہ کو بتائے کامیابی کے گُر

کیرئیر رہنمائی ورکشاپ میں ڈی ایم ورشا سنگھ نے طلبہ سے کیا براہِ راست مکالمہ

حاجی پور/ ویشالی (شرافت خان) : ’’ہماری کلیکٹر دیدی‘‘ پروگرام کے تحت ہفتہ کو پشکرنی سبھا گار، حاجی پور میں طلبہ و طالبات کے لیے کیرئیر رہنمائی ورکشاپ کا انعقاد کیا گیا۔ ضلع مجسٹریٹ ویشالی ورشا سنگھ نے خود ورکشاپ کی قیادت کرتے ہوئے ضلع کے پانچ اسکولوں کے طلبہ سے براہِ راست گفتگو کی۔ طلبہ نے کیرئیر سازی اور مسابقتی امتحانات کی تیاری سے متعلق مختلف سوالات ضلع مجسٹریٹ کے سامنے رکھے، جن کا انہوں نے آسان اور عملی انداز میں جواب دیا۔ انہوں نے کہا کہ مثبت سوچ، صبر، نظم و ضبط، ایمانداری اور مسلسل محنت کامیابی کی بنیادی کنجی ہے۔ ناکامی سے مایوس ہونے کے بجائے اپنی غلطیوں اور کمزوریوں کی نشاندہی کرکے ان میں بہتری لاتے ہوئے دوبارہ کوشش کرنی چاہیے۔ مسابقتی امتحانات کی تیاری کے سلسلے میں ڈی ایم نے طلبہ کو پانچویں سے بارہویں جماعت تک کی این سی ای آر ٹی کتابوں کا سنجیدگی سے مطالعہ کرنے، باقاعدگی سے اچھے اخبارات پڑھنے اور کرنٹ افیئرز پر خصوصی توجہ دینے کا مشورہ دیا۔ انہوں نے اسمارٹ فون اور آن لائن دستیاب تعلیمی مواد کا مثبت اور مفید استعمال کرنے کی بھی تلقین کی۔

معاشی طور پر کمزور طلبہ کی حوصلہ افزائی کرتے ہوئے ڈی ایم نے کہا کہ وسائل کی کمی تعلیم اور صلاحیت کی راہ میں رکاوٹ نہیں بننی چاہیے۔ ضرورت پڑنے پر اعلیٰ تعلیم کے لیے تعلیمی قرض سمیت دستیاب سہولیات سے فائدہ اٹھا کر طلبہ اپنی تعلیم جاری رکھ سکتے ہیں۔

ورکشاپ کے دوران طلبہ کو نمونہ سوالیہ پرچے، نوٹ بک اور قلم بھی فراہم کیے گئے۔ بڑی تعداد میں طلبہ نے مستقبل میں انتظامی خدمات میں جانے کی خواہش ظاہر کی۔ ڈی ایم نے طلبہ کے جذبے کی ستائش کرتے ہوئے انہیں اپنے مقصد کے تئیں پوری لگن کے ساتھ مسلسل محنت کرنے کی ترغیب دی۔ ’’ہماری کلیکٹر دیدی‘‘ پروگرام کے ذریعے طلبہ کو ضلع مجسٹریٹ کے ساتھ براہِ راست گفتگو کا موقع ملا، جس سے طلبہ میں مسابقتی امتحانات کی تیاری اور مستقبل کے کیرئیر کو لے کر نیا حوصلہ اور اعتماد پیدا ہوا۔