تاثیر 10 اگست ۲۰۲۶:- ایس -ایم- حسن
سیتامڑھی (مظفر عالم): نانپور بلاک کی ددری پنچایت کی مسلسل دوسری بار منتخب سرپنچ عصمت پروین کے انتقال پر سابق رکنِ اسمبلی سید ابو دوجانہ نے گہرے رنج و غم کا اظہار کیا ہے۔ انہوں نے مرحومہ کے انتقال کو ددری پنچایت سمیت پورے علاقے کے لیے ایک بڑا اور ناقابلِ تلافی نقصان قرار دیا۔ عصمت پروین کا دربھنگہ کے ایک نجی اسپتال میں علاج کے دوران 24 جولائی کو انتقال ہوگیا۔ ان کے انتقال کی خبر پھیلتے ہی پورے علاقے میں غم کی لہر دوڑ گئی۔ جمعہ کے روز جب ان کا جسدِ خاکی آبائی گاؤں بہورار پہنچا تو آخری دیدار کے لیے بڑی تعداد میں لوگ جمع ہوگئے۔ ہر طرف سوگ اور افسردگی کا ماحول تھا۔ نمازِ عصر کے فوراً بعد ہزاروں سوگواروں کی موجودگی میں مرحومہ کی نمازِ جنازہ ادا کی گئی، جس کے بعد اشک بار آنکھوں کے ساتھ انہیں سپردِ خاک کر دیا گیا۔ جنازے میں عوامی نمائندوں، سماجی کارکنوں، معزز شخصیات، رشتہ داروں اور بڑی تعداد میں اہلِ علاقہ نے شرکت کی۔ سرپنچ عصمت پروین کے انتقال کے بعد سابق رکنِ اسمبلی سید ابو دوجانہ 9 اگست کو بہورار گاؤں پہنچے اور مرحومہ کے اہلِ خانہ سے ملاقات کرکے تعزیت اور ہمدردی کا اظہار کیا۔ انہوں نے اہلِ خانہ کو تسلی دیتے ہوئے کہا کہ دکھ کی اس گھڑی میں وہ غم زدہ خاندان کے ساتھ کھڑے ہیں۔ سید ابو دوجانہ نے کہا کہ عصمت پروین ایک مخلص، باصلاحیت اور عوامی خدمت کے جذبے سے سرشار خاتون تھیں۔ انہوں نے طویل عرصے تک ددری پنچایت کے عوام کی خدمت کی اور عوامی مسائل کے حل کے لیے ہمیشہ سرگرم رہیں۔ ان کا انتقال صرف ان کے خاندان کا نقصان نہیں بلکہ ددری پنچایت اور پورے علاقے کے لیے ایک بڑا خلا ہے، جسے پُر کرنا آسان نہیں ہوگا۔