تاثیر 22 ستمبر ۲۰۲۶:- ایس -ایم- حسن
کاٹھمنڈو، 22 ستمبر:نیپال کے محکمہ موسمیات نے پیر کو جاری خصوصی موسمی بلیٹن میں آئندہ جمعہ سے اتوار تک ملک کے بیشتر حصوں میں گرج چمک اور بجلی کے ساتھ بارش کی پیش گوئی کی ہے۔ محکمہ نے بعض علاقوں میں شدید سے انتہائی شدید بارش کی وارننگ بھی جاری کی ہے۔
محکمہ کے مطابق، جمعہ سے اتوار تک گنڈکی اور لمبنی صوبوں میں موسم کا سب سے زیادہ اثر دیکھنے کو مل سکتا ہے۔ ان دونوں صوبوں میں کئی مقامات پر شدید سے انتہائی شدید بارش ہونے کا امکان ہے۔ محکمہ موسمیات نے مدھیش صوبے کو چھوڑ کر چھ صوبوں کے 42 اضلاع میں اورنج الرٹ جاری کیا ہے۔ ان اضلاع میں سیلاب اور لینڈ سلائیڈنگ کا خطرہ زیادہ بتایا گیا ہے۔
محکمہ نے گنڈکی صوبے کے تمام 11 اضلاع کو اورنج الرٹ میں رکھا ہے۔ لمبنی صوبے کے 12 اضلاع میں سے رولپا، بانکے اور بردیا کو چھوڑ کر باقی تمام اضلاع میں اورنج الرٹ جاری کیا گیا ہے۔ اس کے علاوہ مدھیش، کوشی، باگمتی اورمغربی صوبوں کے بعض مقامات پر شدید سے انتہائی شدید بارش، جبکہ کرنالی صوبے کے کچھ علاقوں میں شدید بارش کی پیش گوئی کی گئی ہے۔