تاثیر 26 ستمبر ۲۰۲۶:- ایس -ایم- حسن
نئی دہلی، 26 ستمبر: دہلی کے سمے پور بادلی صنعتی علاقے فیز-2 میں ہفتہ کی صبح سویرے ایک پلاسٹک مولڈنگ فیکٹری میں آگ لگ گئی۔ تقریباً تین گھنٹے کی سخت مشقت کے بعد آگ پر قابو پایا جا سکا۔ حادثے میں تین افراد معمولی طور پر زخمی ہوئے، جنہیں امبیڈکر اسپتال میں ابتدائی علاج کے بعد چھٹی دے دی گئی۔
فائر بریگیڈ محکمہ کے مطابق، ہفتہ کو 00:35 بجے فیکٹری میں آگ لگنے کی اطلاع ملی۔ ابتدائی طور پر فائر بریگیڈ کی دو گاڑیوں کو موقع پر بھیجا گیا۔ آگ کی شدت کو دیکھتے ہوئے رفتہ رفتہ وسائل بڑھائے گئے اور بعد میں کل 15 فائر بریگیڈ گاڑیوں کو آگ بجھانے کے کام میں لگایا گیا۔ آگ فیکٹری نمبر-44 کے گیٹ نمبر-5 کے قریب واقع پلاسٹک مولڈنگ یونٹ میں لگی تھی۔ فیکٹری تقریباً 250 مربع گز کے علاقے میں بنی تھی اور اس میں بیسمنٹ، گراؤنڈ فلور اور دو منزلیں تھیں۔ چھت پر عارضی ڈھانچہ بھی بنا ہوا تھا۔
فائر بریگیڈ محکمہ نے بتایا کہ تقریباً تین بجے آگ پر قابو پا لیا گیا اور 3:15 بجے آگ بجھانے کا کام مکمل کر لیا گیا۔ تاہم احتیاط کے طور پر ٹھنڈا کرنے (کولنگ) کا کام جاری رکھا گیا۔ صبح تقریباً 6:35 بجے فائر بریگیڈ کی تمام گاڑیاں موقع سے واپس لوٹ گئیں۔