تاثیر16 اکتوبر ۲۰۲۶:- ایس -ایم- حسن
دہرادون، 16 اکتوبر: اتراکھنڈ کے وزیر اعلیٰ پشکر سنگھ دھامی نے کانگریس اور اس کی اتحادی جماعتوں کو نشانہ بناتے ہوئے الزام لگایا ہے کہ جمہوری طریقے سے اقتدار حاصل کرنے میں ناکامی کے بعد اپوزیشن افراتفری کے ذریعے اقتدار کی تبدیلی کی راہ تلاش کر رہی ہے۔وزیر اعلیٰ نے جمعہ کے روز سوشل میڈیا پلیٹ فارم ایکس پر جاری اپنی پوسٹ میں سوال اٹھایا کہ بنگلہ دیش کی طرز پر ہندوستان میں اقتدار کی تبدیلی کی بات کرنے والوں کو عوام کے مینڈیٹ پر بھروسہ کیوں نہیں ہے؟
انہوں نے الزام لگایا کہ آئینی اداروں پر سوال اٹھا کر، ملک میں بدامنی کا ماحول پیدا کرکے اور ترقی کی راہ میں رکاوٹیں کھڑی کرکے اقتدار حاصل کرنے کی کوششیں کامیاب نہیں ہوں گی۔دھامی نے کہا کہ 2014 کے بعد ملک کے عوام نے ترقی اور پیش رفت دیکھی ہے، جبکہ کانگریس کے دور حکومت میں بدعنوانی اور لوٹ مار دیکھنے کو ملتی تھی۔ انہوں نے کہا کہ جمہوریت میں اقتدار تک پہنچنے کا راستہ عوام کے ووٹ سے ہوکر گزرتا ہے، افراتفری کے ذریعے نہیں۔