تاثیر3 نومبر ۲۰۲۶:- ایس -ایم- حسن
سلی گوڑی، 3 نومبر: بابری مسجد کے یومِ تاسیس کے موقع پر قومی شاہراہ-34 جام کرنے کی رکن اسمبلی ہمایوں کبیر کی دھمکی پر بھارتیہ جنتا پارٹی (بی جے پی) نے سخت موقف اختیار کیا ہے۔ منگل کو مرکزی وزیر سکانت مجمدار اور ریاستی وزیر سیاحت شنکر گھوش نے انہیں قانون کی پاسداری کرنے کی نصیحت کی۔ وہیں، شنکر گھوش نے ہمایوں کبیر پر سخت تنقید کرتے ہوئے انہیں سیاست میں غیر متعلق قرار دیا ہے۔
ہمایوں کبیر نے اتوار کو بیل ڈانگا سے اعلان کیا تھا کہ بابری مسجد کے یومِ تاسیس کے موقع پر مرشدآباد میں ریزینگر سے بہرام پور تک تقریباً 30 کلومیٹر طویل قومی شاہراہ-34 کو جام کیا جائے گا۔ انہوں نے انتظامیہ کو چیلنج کرتے ہوئے کہا تھا کہ اگر پولیس میں ہمت ہے تو انہیں روک کر دکھائے۔
اس معاملے پر مرکزی وزیر سکانت مجمدار نے کہا کہ بھارتیہ نیائے سنہتا کے تحت قومی شاہراہ کو مسدود کرنا ایک ناقابلِ ضمانت جرم ہے۔ انہوں نے رکن اسمبلی سے ایسی سرگرمیوں سے دور رہنے کی اپیل کی۔ اس کے ساتھ ہی انہوں نے مشورہ دیا کہ مسجد کا نام بابر کے بجائے کسی دوسری شخصیت کے نام پر رکھا جانا چاہیے۔