تاثیر 03 ستمبر ۲۰۲۶:- ایس -ایم- حسن
گوہاٹی، 03 ستمبر: آسام کے وزیر اعلیٰ ہیمنت بسو سرما نے دعویٰ کیا ہے کہ بنگلہ دیش کی بین الاقوامی سرحد پر تعینات سکیورٹی فورسز نے بھارت میں مبینہ طور پر غیر قانونی طور پر داخل ہونے کی کوشش کرنے والے 22 افراد کو روک دیا۔ وزیر اعلیٰ نے کہا کہ سکیورٹی فورسز نے ان افراد کی شناخت کی اور انہیں سرحد پر ہی بھارت میں داخل ہونے سے روک دیا۔
وزیر اعلیٰ نے سوشل میڈیا پلیٹ فارم ’ایکس‘ پر ایک پوسٹ میں کہا کہ بین الاقوامی سرحد پر چوکس سکیورٹی فورسز نے 22 افراد کی شناخت کی، جو مبینہ طور پر غیر قانونی طریقے سے بھارت میں دراندازی کی کوشش کر رہے تھے۔ انہوں نے کہا کہ سبھی کو سرحد پر ہی روک دیا گیا۔
وزیر اعلیٰ نے اپنی پوسٹ میں لکھا، ’’آسام کی گلی میں: نو انٹری‘‘۔ دراندازی کی کوششوں کے حوالے سے سخت موقف اختیار کرتے ہوئے انہوں نے کہا کہ ایسی تمام کوششوں کا یہی انجام ہوگا۔
تاہم وزیر اعلیٰ نے یہ واضح نہیں کیا کہ یہ افراد کس ملک کے شہری تھے اور انہیں آسام کے کس مقام پر بھارت میں داخل ہونے سے روکا گیا۔