تاثیر 26 ستمبر ۲۰۲۶:- ایس -ایم- حسن
ہوڑہ، 26 ستمبر (عبدالقیوم انصاری) ہوڑہ مسلم ہائی اسکول ایچ ایس، جو حکومتِ مغربی بنگال سے اسپانسرڈ ادارہ ہے، کے احاطے میں ہفتہ کے روز مفت آنکھوں کے معائنے اور چشمہ تقسیم کیمپ کا انعقاد کیا گیا۔ سسرت اسپتال، کولکاتا کے تعاون سے منعقدہ اس کیمپ میں 500 سے زائد طلبہ اور اسکول کے اسٹاف ممبران نے شرکت کرکے اپنی آنکھوں کی جانچ کرائی۔
کیمپ کا بنیادی مقصد طلبہ میں آنکھوں کی صحت کے حوالے سے بیداری پیدا کرنے کے ساتھ بصارت سے متعلق مسائل کی بروقت نشاندہی کرنا تھا۔ مختلف عمر کے طلبہ کا ماہرین نے آنکھوں کا معائنہ کیا اور ضرورت کے مطابق انہیں ضروری طبی رہنمائی فراہم کی۔ بصارت کی ضرورت والے طلبہ میں چشمے بھی تقسیم کیے گئے۔
پروگرام میں معروف سماجی و سیاسی کارکن پنکج شا نے بطور مہمان شرکت کی اور طلبہ کی حوصلہ افزائی کی۔ اسکول کے سابق صدر عبدل قیوم انصاری، ندیم انصاری، جمال احمد، بنٹی سمیت اسکول کے متعدد خیرخواہوں نے بھی پروگرام میں شرکت کی۔ سسرت اسپتال جانب سے ایونٹ انچارج اتانو ہلدَر اور جولی سنہا رائے نے اپنی ٹیم کے ہمراہ طلبہ کی آنکھوں کا معائنہ کیا اور انہیں آنکھوں کی صحت سے متعلق ضروری مشورے دیے۔ اسکول کے ٹیچر اِن چارج عبدالرؤف نے اساتذہ کے ساتھ پورے پروگرام کی نگرانی کی اور طلبہ کی منظم شرکت کو یقینی بنایا۔
اس فلاحی پروگرام کی کامیابی میں سنکلپ ٹوڈے کے سیکریٹری امتیاز بھارتیہ کا خصوصی تعاون رہا۔ اسکول انتظامیہ نے ان کے تعاون پر اظہارِ تشکر کیا۔ پروگرام کے اختتام پر مقررین نے کہا کہ صحت مند آنکھیں طلبہ کی بہتر تعلیم اور روشن مستقبل کے لیے بنیادی اہمیت رکھتی ہیں۔ کیمپ کو بچوں کی بہتر بصارت، بہتر تعلیم اور روشن مستقبل کی جانب ایک قابلِ تحسین قدم قرار دیا گیا۔