TAASIR NEWS NETWORK- SYED M HASSAN –22 MAY
اسلام آباد، 22 مئی: پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے خدشہ ظاہر کیا ہے کہ انہیں کل (منگل) کو اسلام آباد میں گرفتار کیا جاسکتا ہے۔ خان نے کہا کہ اس کا 80 فیصد امکان ہے۔ انہوں نے یہ دعویٰ عالمی میڈیا کو دیے گئے ایک انٹرویو میں کیا ہے۔
انہوں نے واضح کیا کہ اس کے باوجود وہ القادر ٹرسٹ معاملے کی تحقیقات میں شامل ہونے کے لیے 23 مئی کو اسلام آباد جائیں گے۔ وہ عدالت میں پیش بھی ہوں گے۔ سابق وزیر اعظم خان نے کہا کہ حکمران اتحاد نے انہیں سیاسی منظر سے ہٹانے کا عزم کیا ہے۔ انہوں نے الزام عائد کیا کہ ملک کے سابق آرمی چیف قمر جاوید باجوہ نے ان کی حکومت کو غیر مستحکم کرنے کی کوشش کی۔
عمران خان نے کہا کہ وہ مختلف مقدمات میں ضمانت کے لیے منگل کو اسلام آباد کی عدالت میں پیش ہوں گے۔ انہیں لگ رہا ہے کہ اس دوران اسے گرفتار کر لیا جائے گا۔ انہوں نے دعویٰ کیا کہ اب تک پی ٹی آئی کے 10 ہزار سے زائد کارکنوں کو گرفتار کیا جا چکا ہے جن میں سرکردہ رہنما اور خواتین بھی شامل ہیں۔
واضح رہے کہ عمران خان نے قومی احتساب بیورو (نیب) کو آگاہ کیا ہے کہ وہ منگل کو صبح 11 بجے القادر ٹرسٹ کیس کی تحقیقات میں شامل ہونے کے لیے پیش ہو سکتے ہیں۔ انہوں نے درخواست کی ہے کہ بیورو مذکورہ اوقات کی تصدیق کرے۔
