تاثیر 28 مارچ ۲۰۲۵:- ایس -ایم- حسن
ممبئی ، 28 مارچ:اسٹینڈاپ کامیڈین کنال کامرا نے ممبئی میں مہاراشٹر کے نائب وزیر اعلیٰ ایکناتھ شندے کے خلاف کیے گئے ریمارکس پر ان کے خلاف درج ایف آئی آر کے بعد ٹرانزٹ پیشگی ضمانت کے لیے مدراس ہائی کورٹ سے رجوع کیا ہے۔ممبئی میں کامرا کے ذرائع سے ملی اطلاع کے مطابق، کیس کا فوری ذکر آج جسٹس سندر موہن کے سامنے کیا گیا۔یہ معاملہ ایسے وقت میں سامنے آیا ہے جب ممبئی پولیس نے کامرا کو 31 مارچ کو پولیس کے سامنے پیش ہونے کا نوٹس جاری کیا ہے۔ کامرا کے خلاف یہ مقدمہ کھار کے ہیبی ٹیٹ کامیڈی کلب میں ہونے والے ایک شو کے دوران ایکناتھ شندے کے خلاف مبینہ طور پر توہین آمیز پیروڈی گانے پر درج کیا گیا تھا۔اس واقعے کے بعد شیو سینا کے حامیوں نے شدید ردعمل ظاہر کیا اور اتوار کی رات کامیڈی کلب اور ایک ہوٹل میں توڑ پھوڑ کی۔ کامرا (36)کے خلاف شیو سینا کے ایم ایل اے مرجی پٹیل کی شکایت پر کھار پولیس اسٹیشن میں مقدمہ درج کیا گیا تھا۔