تاثیر 5 مئی ۲۰۲۵:- ایس -ایم- حسن
ریو ڈی جنیرو، 04 مئی : برازیل کی پولیس نے ریو ڈی جنیرو میں پاپ اسٹار لیڈی گاگا کے تاریخی فری کنسرٹ میں دھماکہ کرنے کی سازش رچنے کے الزام میں دو افراد کو گرفتار کر لیا ہے۔ یہ کنسرٹ ہفتے کے روز کوپاکبانا بیچ پر منعقد کیا گیا تھا جس میں اندازاً 25 لاکھ شائقین نے شرکت کی۔
برازیلی حکام کے مطابق مشتبہ افراد کو کنسرٹ سے چند گھنٹے قبل گرفتار کر لیا گیا تھا۔ تاہم، ایونٹ بغیر کسی رکاوٹ کے اختتام پذیر ہوا، جس سے کچھ لوگوں نے خطرے کی سنگینی پر سوالیہ نشان اٹھائے۔ عام طور پر اس طرح کے بڑے ایونٹس کو سیکورٹی خدشات کی وجہ سے منسوخ کر دیا جاتا ہے جیسا کہ گزشتہ سال ویانا میں ٹیلر سوئفٹ کے کنسرٹ کے ساتھ ہوا تھا۔
پولیس نے “خوف و ہراس اور افواہوں سے بچنے کے لیے” فوری طور پر اس سازش کی تفصیلات کو عام نہیں کیا۔ اتوار کو لیڈی گاگا کی ٹیم نے ایک بیان جاری کرتے ہوئے کہا کہ انہیں اس سازش کے بارے میں میڈیا رپورٹس سے معلوم ہوا۔ بیان میں کہا گیا،’’شو سے پہلے اور اس کے دوران پولیس کی جانب سے کوئی سیکورٹی بریفنگ یا الرٹ نہیں تھا۔ لیکن ٹیم نے ایونٹ کی منصوبہ بندی اور اس پر عمل درآمد کے دوران سیکورٹی ایجنسیوں کے ساتھ مل کر کام کیا۔‘‘