تاثیر 6 اکتوبر ۲۰۲۵:- ایس -ایم- حسن
واشنگٹن، 6 اکتوبر: ہندوستانی نژاد تاجر اور موٹل کے مالک راکیش ایہاگابن کو جمعہ کو امریکہ کے پٹسبرگ کے ایسٹ ہلز علاقے میں رابنسن ٹاؤن شپ میں گولی مار دی گئی۔ ملزم نے ان کے سر میں گولی ماری۔ 50 سالہ راکیش ایہاگابن کی موقع پر ہی موت ہو گئی۔ ملزم نے فائرنگ کے دوران ایک خاتون کو بھی گولی مار دی۔
سی بی ایس نیوز کی خبر کے مطابق تفتیش کے دوران فائرنگ کے تبادلے میں ایک پولیس افسر اور مشتبہ شخص زخمی ہو گئے۔ الیگینی کاونٹی پولیس ڈیپارٹمنٹ نے جمعہ کی رات کہا کہ 38 سالہ اسٹینلے ویسٹ پر ہلاکت خیز فائرنگ کے سلسلے میں قتل سمیت کئی الزامات ہیں۔ ملزم اسٹینلے ویسٹ کو گرفتار کر لیا گیا ہے۔
الیگینی کاونٹی پولیس کے مطابق، دوپہر تقریباً 2:30 بجے جاسوس ا سٹیوبن ویلے موٹل آپریٹر راکیش کو گولی مار کر ہلاک کر نے اور ایک خاتون کوزخمی کرنے کے ملزم شخص کی تلاش کر رہے تھے۔ اس دوران شہر اور کاونٹی کے جاسوسوں نے ایسٹ ہلز کے ولنر ڈرائیو پر مشتبہ کار کا سراغ لگایا۔ جیسے ہی وہ کار کے قریب پہنچے، مشتبہ شخص نے گولی چلا دی۔ پٹسبرگ کے ایک جاسوس کی ٹانگ میں گولی لگی۔