تاثیر 21 ستمبر ۲۰۲۶:- ایس -ایم- حسن
نئی دہلی، 21 ستمبر: وزیرآباد واقع دہلی پولیس اکیڈمی (ڈی پی اے) میں پیر کو جسمانی اہلیت کے امتحان (پی ای ایم ٹی) کے دوران 23 سالہ نوجوان کی اچانک گرنے سے موت ہوگئی۔ نوجوان دوڑ مکمل کرتے وقت ٹریک پر ہی بے ہوش ہوکر گر پڑا۔ موقع پر موجود عملے نے اسے فوری ابتدائی طبی امداد دی اور پی سی آر وین کے ذریعے اسپتال پہنچایا، جہاں ڈاکٹروں نے اسے مردہ قرار دے دیا۔
پولیس کے مطابق پیر کو صبح تقریباً 11 بج کر 11 منٹ پر سونیا وہار تھانے کی پولیس کو جے پی سی اسپتال سے اطلاع ملی کہ ڈی پی اے وزیرآباد سے ایک نوجوان کو پی سی آر وین کے ذریعے ایمرجنسی شعبے میں لایا گیا ہے۔ ڈاکٹروں نے معائنے کے بعد اسے مردہ قرار دے دیا۔
متوفی کی شناخت سوربھ کمار (23) کے طور پر ہوئی ہے۔ وہ لچھّی سنگھ کا بیٹا اور اترپردیش کے انوپ شہر کے سلامتی پور گاؤں، نیتا نگر کا رہنے والا تھا۔ پولیس کے مطابق سوربھ ڈی پی اے وزیرآباد میں منعقد کیے گئے پی ای ایم ٹی میں شرکت کے لیے آیا تھا۔ دوڑ کے دوران وہ اچانک ٹریک پر گر گیا۔ عملے نے اسے فوری طبی امداد فراہم کی اور پی سی آر وین سے جے پی سی اسپتال پہنچایا، لیکن اس کی جان نہیں بچائی جا سکی۔