تاثیر21 نومبر ۲۰۲۶:- ایس -ایم- حسن
نئی دہلی، 21 نومبر: مرکزی تحقیقاتی بیورو (سی بی آئی) نے رشوت خوری کے معاملے میں گرفتار سینٹرل گڈز اینڈ سروسز ٹیکس (سی جی ایس ٹی) کے ایک سپرنٹنڈنٹ کی پنچکولہ واقع رہائش گاہ پر تلاشی کے دوران تقریباً 1.86 کروڑ روپے کی نقدی، غیر ملکی کرنسی، سونا اور چاندی برآمد کی ہے۔ ملزم سپرنٹنڈنٹ کو 19 نومبر 2026 کو 10 لاکھ روپے کی رشوت لیتے ہوئے رنگے ہاتھوں گرفتار کیا گیا تھا۔
سی بی آئی کے مطابق، ملزم سپرنٹنڈنٹ لَو کْش کمار کے خلاف 19 نومبر کو مقدمہ درج کیا گیا تھا۔ اس پر ایک نجی کمپنی کے خلاف جی ایس ٹی کارروائی میں ناجائز فائدہ پہنچانے کے عوض رشوت طلب کرنے کا الزام ہے۔ شکایت کنندہ سے 10 لاکھ روپے کی رشوت لیتے ہوئے پنچکولہ میں جال بچھا کر اسے گرفتار کیا گیا۔
20 نومبر کو ملزم کی رہائش گاہ پر تلاشی لی گئی۔ اس دوران 24.29 لاکھ روپے کی ہندوستانی کرنسی، تقریباً 15.65 لاکھ روپے کے مساوی غیر ملکی کرنسی اور تقریباً 1.46 کروڑ روپے مالیت کے سونے کے زیورات، سونے کی اینٹیں اور چاندی برآمد کی گئی۔ برآمد شدہ نقدی اور قیمتی اشیاء کی مجموعی مالیت تقریباً 1.86 کروڑ روپے بتائی گئی ہے۔
تلاشی کے دوران چھ بینک کھاتوں، سرمایہ کاری کے پورٹ فولیو، لائف انشورنس پالیسیوں اور متعدد غیر منقولہ جائیدادوں سے متعلق دستاویزات بھی ملے۔ اس کے علاوہ ملزم اور اس کے اہل خانہ کی گاڑیوں اور مالی لین دین سے متعلق دستاویزات بھی برآمد کیے گئے۔

